Búgin Astanada Pándik komısıalardyń jumysyn qorytyndylǵan baspasóz máslıhaty ótti, dep habarlaıdy baq.kz.

6-13 naýryz aralyǵynda EUÝ-de parlament depýtattary, ǵalymdar, sala mamandarynan jasaqtalǵan arnaıy komısıa myńnan astam oqýlyq, ádistemelik qural, mektepke deıingi tárbıe quralyn saraptamadan ótkizdi. Talqylaýǵa 120-dan astam maman qatysty.

«Tarıhta alǵash ret Pándik komısıanyń quramy 40 adamǵa deıin keńeıtildi. Buǵan deıin ne bary 13 adam jabyq túrde ótkizip, ózderiniń sheshimderin jarıalaıtyn. Osy jolǵy komısıa quramynda ár óńirden kelgen ustazdar, mektep dırektorlary, ǵalymdar, Birǵanym Áıtimova, Bekbolat Tileýhan, Jambyl Ahmetbekov t.b. qatarly Senat pen Májilis depýtattary boldy. Al kitaptardy, oqýlyqtardy jaryqqa shyǵarý úshin otandyq ta, sheteldik te baspalar arasynan 12 baspa qatysty» - deıdi BǴM orynbasary Elmıra Sýhanberdıeva.

Negizgi ózgeris 2, 5 jáne 7-synyp oqýlyqtaryna engizilgen. BǴM buǵan deıin de biraz reforma jasaǵan. Olardyń qatarynda sáttisi de, sátsizi de boldy. Degenmen bul jolǵy úsh synypqa qatysty 197 oqýlyqta qandaı bir jaǵdaımen kemshilikter bolatyn bolsa, oǵan tikeleı mınıstrlik jaýap beretin bolady. Bul týraly baspasóz máslıhatynda Ǵylymı praktıkalyq oqý ortalyǵynyń dırektory Kárimova Bıbigúl málimdedi.

«Jalpy oqýlyqtar tórt jylda bir ret ózgertilip otyrady. Olar oqýshynyń jas erekshelikterin eskere otyryp memlekettik standarttar men baǵdarlamalarǵa tolyq saı ázirlengen oqýlyqtar. Biz 1 jyl boıy 2, 5 jáne 7 synyp oqýlyqtaryna saraptama júrgizdik. Al oqýlyqtaǵy qateler nemese talǵamǵa saı emes mátinder bolsa, mınıstrlik jaýap beredi» - dedi dırektor.

Pándik komısıa bekitken kitaptar mınıstrlikterdiń saıtyna bekitildi. Oqýshylar, ata-analar, ǵalymdar, jalpy kez kelgen adam ony kórip, taldap, talqylap, óz usynys pikirlerin berýge múmkindik bar.