WBA (Super), IBO, WBC jáne IBF tujyrymdary boıynsha álem chempıony Gennadıı Golovkın (36-0, 33 KO) men amerıkalyq boksshy Denıel Djeıkobs (32-1, 29 KO) arasyndaǵy jekpe-jek ótti dep habarlaıdy Qamshy.kz.

Golovkın men Djeıkobs Nú-Iorktegi Madison Square Garden arenasynda rıngke shyqty.

Jekpe-jek Astana ýaqytymen shamamen saǵat 09:40-ta bastaldy. Otandasymyzdyń amerıkalyqqa qarsy kezdesýin «Qazaqstan» jáne KazSport arnalarynan tikeleı efırde tamashalap, jankúıer boldy.

Eń basty aıta keterligi qazaqstandyq boksshy bul kezdesýde ózine tıesili barlyq belbeýin ortaǵa saldy.

«GGG-ge qarsy kezdesý ómirimdegi eń aıtýly jekpe-jek bolaıyn dep tur. Bul maǵan berilgen úlken múmkindik. Endi jeńiske jetý úshin aıanyp qalmaspyn. Ózime ózim tolyqtaı senimdimin. Basymnan ótken qıyn jaǵdaılardan keıin qandaı synaqqa (Denıel 2011 jyly isik aýrýyna shaldyqqan) bolsyn daıynmyn. Qazir eshnárseden qoryqpaımyn», – dep suhbat bergen jekpe-jekten buryn Denıel Djeıkobs.

Alǵashqy eki raýndta eki boksshy da ashyla qoıǵan joq.

Gena buǵan deıingi jekpe-jekterindegideı emes qorǵanysqa da mán bergen.

Úshinshi raýndta Djekıkobstiń bir soqqysy Golovkınge darydy.

Tórtinshi raýndta Djeıbokstiń ıek astynan qaıtara eki ret tıgen Golovkınniń oń qolynyń soqqysy ony sulatyp saldy. Degenmen qaıta turǵan Djeıboks óziniń tájirıbeli boksshy ekenin kórsetti. Ońaı shaǵylatyn jańǵaq emes ekenin kórsetip, erkin júrdi. Jyldamdyǵyn qosqandaı kórindi. Al, Golovkın óz soqqylaryn aýyrlata bastady.Alaıda bul nokdaýn jekpe-jektiń taǵdyryn sheshe almady.

Besinshi raýnd bastala sala Golovkınniń birneshe soqqysy Djeıbokstiń jaǵyna tıdi.

Altynshy, jetinshi raýndta Golovkınniń basymdylyǵy baıqaldy dedi sarapshylar. Jetinshi raýnd óte tartysty ótti.

Segizinshi raýndta kórermender Djeıbokstiń jyldamdyǵyna kýá boldy. Kóptegen mamandar jekpe-jektiń segizinshi raýndta aıaqtalatynyn boljaǵan. Alaıda boljamdary joqqa shyqty.

Toǵyzynshy raýndtyń aıaǵynda Gena qarsylasyn buryshqa tyqsyryp birneshe qarymdy soqqy jasady.

«Denıel laıyqty túrde qarsylyq kórsetedi dep senemin. Biraq kezdesýdiń ekinshi bóliginde, ıaǵnı jetinshi jáne toǵyzynshy raýndtardyń arasynda Gennadııdiń basymdyǵy sezilip, Djeıkobstyń ókilderi jekpe-jekti toqtatýǵa májbúr bolady. Nemese ol joıqyn soqqylardan esinen tanýy múmkin», ­– degen edi Golovkınniń jattyqtyrýshysy Abel Sanches.

Onynshy raýndta boksshylar teń jekpe-jek ótkizdi.

Aıta ketsek, buǵan deıin Golovkın eshbir jekpe-jegin 12 raýndqa jetkizbegen. Onyń eń kóp raýndty jekpe-jegi tek 11 raýndqa jetken.

11 raýndta Djeıboks Golovkınge shabýyldaryn údetti. Bul raýnd Djeıbokstiń paıdasyna aıaqtady.

Sońǵy raýnd óte tartysty ótti.

Mansabynda birde-bir ret jeńilip kórmegen Gennadıı Golovkın sharshy alańda 36 jekpe-jek ótkizip, 33-in nokaýtpen aıaqtaǵan. Otandasymyz  2014 jyldyń maýsymynan bastap WBA nusqasy boıynsha sýperchempıon, 2011 jyldan bastap IBO nusqasy boıynsha  Álem chempıony, 2015 jyldan bastap IBF nusqasy boıynsha  Álem chempıony tıtýldaryna ıe. Al, 2016 jyly Saýl «Kanelo» Alvarestiń jekpe-jek ótkizýinen bas tartqannan keıin WBC nusqasy boıynsha  Álem chempıony atandy.

Qarsylasy Denıel Djeıkobs - orta salmaq dárejesindegi WBA nusqasy boıynsha Álem chempıony (2014 jyldan bastap) jáne NABF nusqasy boıynsha Soltústik Amerıka chempıony (2010). Kásibı rıngte 33 jekpe-jek ótkizip, tek bir ret qana jeńilistiń ashshy dámin tatyp kórgen. Amerıkalyq boksshyny reseılik Dmıtrıı Pırog nokaýtqa jibergen bolatyn.

Aıta ketsek, Djeıbokstiń bas ıýge turatyn úlken erligi onyń rak aýrýynan emdelip shyǵyp úlken sportqa oralýy.

Djeıkobs AQSH-tyń Nú-Iork qalasynda týyp-ósken. Karerasyn áýesqoı bokstan bastaǵan. Munda barlyǵy 137 jekpe-jekte jeńiske jetip, tek jeteýinde ǵana qarsylasyna ese jiberipti. 2003 jyly jastar arasynda Olımpıada chempıony atansa, 2004 jyly 19 jasqa deıingiler arasynda AQSH chempıony ataǵyna qol jetkizgen. «Altyn qolǵap» jarysynyń tórt dúrkin jeńimpazy atanǵan.

Áýesqoı boksta biraz belesterdi baǵyndyrǵan soń kásipqoıǵa aýysty. Alǵash kezdesýinde 2007 jyly 8 jeltoqsanda Floıd Meıýezer men Rıkkı Hattonnyń anderkartynda meksıkalyq Hose Hesýs Hýrtadomen judyryqtasyp, 29 sekýndta nokaýtpen jeńdi.

Osydan keıin meksıkalyq Gestor Lopespen shyǵyp, birinshi raýndta-aq sulatyp túsirdi. Al 2008 jyldyń 16 aqpanynda Aleksandr Volkovty 2-raýndta nokaýtpen jeńdi. Kásipqoı boksqa jańadan kelgen jas tarlan álemdik rıngte ózindik ornyn qalyptastyrý úshin nebir myqtylarmen kúsh synasty. Osydan keıin birneshe aıdyń ishinde alty birdeı jekpe-jek ótkizip, bárin de ýaqytynan buryn jeńiske jetken.

2008 jyldyń 27 qyrkúıeginde Emmanýel Gonsalespen synǵa túsip, kásipqoı rıngte birinshi ret kezdesýdi tolyǵymen ótkizdi. Qarsylasyn birneshe márte esinen tandyryp baryp, tóreshilerdiń sheshimimen kezekti jeńisine jetti.

2009 jyldyń 2 mamyrynda Maık Ýolker men Djeıms Kırklend judyryqtasýy tıis bolatyn. Biraq kútpegen jerden Kırklend qamaýǵa alynyp, jekpe-jekke bir aptadaı ýaqyt qalǵanda Djeıkobsqa Ýolkermen kúsh synasý týraly usynys túsedi. Daıyndyǵynyń azdyǵyna qaramaı ol birden kelisimin beredi. Ádettegideı nokaýtpen jeńbese de qazylar biraýyzdan jeńisti amerıkalyq boksshyǵa berdi.

2009 jyldyń 22 tamyzynda otandasy Ishe Smıtpen kúsh synasyp, WBO NABO (Soltústik Amerıka boks qaýymdastyǵy) nusqasy boıynsha álem chempıony atandy. Araǵa jeti aı salyp, Hýan Astorgýdy jeńip, NABF (Soltústik boks federasıasy) tıtýlyna qol jetkizdi.

Djeıkobstyń bokstaǵy mańyzy joǵary, aıtýly jekpe-jekteriniń biri 2010 jyldyń 31 shildesinde ótti. Bul kúni ol WBO belbeýi úshin reseılik Dmıtrıı Pırogpen aıqasty. Buǵan deıin qos boksshy da jeńilis kórmegen edi. 5-raýndta reseılik Denıeldi nokaýtpen jeńdi. Bul onyń alǵashqy nokaýty bolatyn.

Al kelesi eki kezdesýinde ýaqytynan buryn jeńdi.

Qaterli isikpen kúres

Bul shamamen 2010 jyl bolatyn. Osy eki jeńisten keıin Djeıkobs biraz ýaqyt kórinbeı ketti.

2011 jyldyń sońyna taman «New York Daily News» basylymy alǵash bolyp, onyń qaterli isikke shaldyqqanyn jazdy. Osteosarkoma, ıaǵnı súıek isigi saldarynan kúni keshe rıngte atoı salǵan jas boksshy aıaǵyn basa almaı qaldy. Julynyna toǵyz saǵat ota jasalyp, odan keıin hımıaterapıanyń birneshe kýrsyn aldy. Mundaı aýyr dertke shaldyqqan adam boksqa qaıta oralady dep kútken adam kem de kem edi. Alaıda, erik jigeriniń keremet kúshtiligi arqasynda Djeıkobs araǵa 19 aı salyp boksqa qaıta oralady.

«Beıne bir basqa álemge uzaq saıahatqa baryp kelgendeı boldym», – dep eske aldy ózi naýqasy týraly.

Aýrý Djeıkobstyń qaıyrymdylyq qor ashýyna sebep boldy.

«Aýrýhanada jatqan kúnderimde ómirge degen kózqarasym ózgerdi. Aınalamdaǵy beıkúná jandardyń ómirge degen qushtarlyǵyn kórdim. Osydan emdelip shyqsam, naýqastarǵa kómektesemin dep ózime ózim sert berdim. Al endi muny moınymdaǵy qaryzym dep bilemin», – dedi ol.

Sharshy alańǵa qaıta oralǵan Djeıkobs avstralıalyq Djarrod Flechermen WBA nusqasynyń chempıondyǵy úshin synǵa túsip, 5-raýndta nokaýtpen jeńdi.

Nú-Iorkte 2015 jyly 1 tamyzda Serhıo Moramen arada tartysty jekpe-jek ótti. Alǵashqy raýndtyń ózinde-aq ekeýi de nokdaýn alyp úlgeredi. Degenmen, kelesi raýndta tez es jıǵan Djeıkobs jyldam soqqylarmen ústi-ústine tópelep, jeńiske jetti. Al revansh ótken jyldyń 9 qyrkúıeginde ótti. Munda ol taǵy da basym boldy.

«Djeıkobs men kórgen pancherlerdiń ishindegi eń myqtysy. Onyń kúshin sózben aıtyp jetkize almaımyn. Orta salmaqtaǵy úzdikterdiń biri Gennadıı Golovkınmen kezdesse, laıyqty qarsylas bola alady dep oılaımyn. Menińshe, soqqyny kim kótere alsa, bul aıqasta sol jeńiske jetedi», – dedi Mora.

Kásipqoı bokstaǵy eń iri jeńisine Djeıkobs 2015 jyldyń 6 jeltoqsanynda jetti. Buǵan deıin jeńilmegen Pıter Kýıllınmen jekpe-jek ótkizip, 85 sekýndtyń ishinde tehnıkalyq nokaýtpen utty. Mamandar bul aıqasta Kýıllın nebári 16 ret judyryq sermese, sonyń tek ekeýi ǵana dál tıgenin, al Djeıkobs jasaǵan 53 soqqynyń 27-si nysanaǵa daryǵanyn anyqtady.

Djeıkobstyń rıngtegi jeńisterin esepke almaǵannyń ózinde qaterli dertten aıyǵyp, boksqa qaıta oralýyn eshbir erlikten kem sanaýǵa bolmaıdy. Golovkınniń buǵan deıingi qarsylastaryna baqylaı kóz salsaq, aldyn-ala quldyrap, psıhologıalyq jeńilis taýyp jatady. Al Denıel she? Qaterli aýrýdan aıyǵyp, sharshy alańǵa qaıta oralǵan sportshynyń rýhanı osal bolýy múmkin be? Osydan qarap GGG-ge bul joly qandaı qarsylas tap kelip turǵanyn shamalaýǵa bolady.

Esterińizge salsaq, osy jekpe-jekte jeńis Golovkınde bolsa 2,5 mıllıon dollar, al Djeıbokske 1,75 mıllıon dollar gonorar qoıylǵan edi.