5 jasynda amerıkalyqtar asyrap alǵan qazaq qyzy 16 jasynda Qazaqstanǵa, Otanyna qaıtýǵa bel baılaıdy. Bilim alý úshin keldim degen qyzdyń eline oralýynyń sebebi basqa edi. Dombyranyń syńǵyyrlaǵan únin estip, Otanyna bireý shaqyrǵandaı boldy Jannany.

16 jastaǵy Janna búginde KIMEP stýdenti. Qazaq tilin meńgerýdi qolyna alyp, týǵan jeri jaıynda keń zerttep júr. Elge qaıtýǵa asyrap alǵan anasynyń septigi tıgen kórinedi. Sebebi, amerıkalyq anasy qyzǵa jastaıynan Qazaqstannyń mádenıetin tanystyrýmen keledi.

Jannanyń amerıkalyq ata-anasy jas kúnderinde Azıa elderine saıahat jasaýda unatqan eken. Sol kezde osy bir keremet óńirden bala asyrap alýdy armandaıdy. Keıin ózderiniń tuńǵyshtary ómirge kelgen tusta otaǵasy júrek talmasynan kóz jumǵan. Al jalǵyzbasty ana jarynyń armanyn oryndaý maqsatynda bala asyrap alý jolyn izdestire bastaıdy. Tabady da. Tańdaýy Qazaqstanda tárbıelenip jatqan Jannaǵa túsken. Uzaq ýaqytqa sozylǵan asyrap alý prosesin bastan ótkerip, jetim qyzdy óz eline alyp ketedi. El qatarly tárbıe berip, bilim aýlyna bar jaǵdaıdy jasaıdy. Onyń qazaq qyzy ekendigin únemi esine salýmen bolady.

«Men Kanzastaǵy (AQSH) mektepte bilim aldym. Onda azıalyq násilden úsh bala ǵana boldyq. Qazaqtar bolǵan joq. Ol kezde men óz elimniń mádenıeti týraly tym az biletin edim. Anam maǵan qazaq ekenimdi, týǵan jerim Qazaqstan dep atalatyndyǵyn únemi aıtýmen boldy. Ol maǵan qazaq tilin úıretetin oqytýshy tabýǵa da tyrysqan edi. Biraq ondaı múmkindik bolmady. Birde men Nú-Gempshırde asyrandy balalarǵa arnalǵan qazaq tildi jazǵy lager baryn bildim. Anam meni sol jerge alyp bardy. Nátıjesinde lagerdi uıymdastyrýshy eriktilerdiń biri Erden meniń Almatyǵa kóship kelýime járdem berdi», – deıdi Janna.

Ol lagerde júrgen kezde qazaqtyń dástúrli dastarhanynan dám tatyp, ulttyq mádenıet týraly tanymyn keńeıtken. Dombyra únimen de osy jerde tanysqan eken. Artynsha qazaq dalasyna kelýdi maqsat tutady. Óıtkeni naǵyz qazaq bolý úshin shetelde emes óz elińde ómir súrý kerek. Sondyqtan da qosymsha jumys istep, qarjy jınaýǵa kóshken. Aıtýynsha, alǵashynda qonaq úıge tazalyqshy bolyp ornalasady, keıin ózi oqıtyn kolejdiń medıa ortalyǵynyń SMM – menedjeri bolyp qyzmet etedi.

Janna Imel 2016 jyldan beri KIMEP stýdenti. Ol qazaq tilin úırenýdi áli de jalǵastyrý ústinde. Az ýaqyttyń ishinde erkin meńgerip alýdy maqsat tutypty. Sonymen qatar Qazaqstandy da zertteý ústinde eken. Bala kúninen qalǵan estelikteri joqqa tán. Ári amerıkalyq tárbıesi men mentalıteti bul óńirdiń tabıǵatyna saı kelmeıdi eken. Ol sabaqtan bos ýaqytynda balalarǵa aǵylysh tilinen dáris beredi eken. Qazaq dalasyna kelgenine qýanyshty

«Men qazaq taǵamyna ábden úırenip aldym. Tipti et asýdy da meńgerdim. Adamdar meniń armanym týraly estigen kezde qoldan kelgenshe kómek berýge tyrysady. Meniń sózdik qorym jańa sózdermen tolyqty. Qazaq tildi ortada ózimdi ustaýdy úırendim. Men Qazaqstanǵa kelgenime jáne bul sheshimimdi anamnyń qoldaǵanynan baqyttymyn», – deıdi Janna Imel.

Foto: Vladımır Tretákov