Astanada «Sahnager-2017» Ulttyq teatr syılyǵynyń laýreattaryn marapattaý saltanaty ótedi.  Búgin Ortalyq komýnıkasıalar qyzmetinde ótken brıfıńte  Qazaqstannyń halyq ártisi, Memlekettik syılyqtyń laýreaty  Asanáli Áshimov, kıno jáne teatr aktrısasy, Qazaqstannyń eńbek sińirgen ártisi Merýert Ótekeshova, Memlekettik respýblıkalyq koreı mýzykalyq komedıa teatrynyń dırektory Lúbov Nı, QR eńbek sińirgen qaıratkeri Erlan Bilál, «Qazaq áýenderi» AQ prezıdenti Asqat Maemırov  «Sahnager-2017» Ulttyq teatr syılyǵy týraly áńgimelep berdi dep habarlaıdy qamshy.kz.

Bul syılyq respýblıkamyzda jýyrda taǵaıyndalǵan ári alǵash ret tapsyrylady. Saltanatty jıyn «Qazaqstan» ortalyq konsert zalynda Qazaqstannyń teatr qaýymdastyǵynyń ókilderiniń qatysýymen ótpek. Osy jyly Qazaqstanda Halyqaralyq  teatr  kúni teatr óneri salasyndaǵy eleýli oqıǵa – «Sahnager-2017» ulttyq teatr syılyǵyn tapsyrý saltanatymen erekshelenbekshi.

Qazaqstandyq «Sahnager-2017» ulttyq teatr syılyǵy «Samuryq-Qazyna» Ulttyq ál-aýqat qory» AQ qoldaýymen 2017 jyly   Qazaqstan  Teatrlary  asosıasıasynyń bastamasymen taǵaıyndalyp otyr. Ulttyq syılyq teatr dástúrin saqtaý men nyǵaıtýǵa baǵyttalǵan.

Qazaqstan  Teatrlary  asosıasıasynyń (QTA) negizi 2016 jyly qalanǵan. Onyń prezıdenti bolyp Qazaqstan men KSRO Halyq ártisi, Memlekettik syılyqtar laýreaty, Reseı Federasıasynyń «M. Lomonosov» ordeniniń kavaleri, «Otan», «Dostyq» ordenderiniń kavaleri Asanáli Áshimov taǵaıyndalǵan bolatyn.  

Qazaqstandyq «Sahnager-2017» ulttyq teatr syılyǵy teatr óneri salasyndaǵy shyǵarmashylyq jetistikter úshin beriledi. Teatr qaýymdastyǵynyń pikiri boıynsha, syılyq qazaqstandyq patrıotızm men ulttyq mádenıetke degen súıispenshilikti nyǵaıtýǵa baǵyttalyp, eńbekke, kásibı jetistikke, Otanǵa qyzmet etýge, joǵarǵy patrıottyq ıdeıalarǵa oń kózqaras qalyptastyratyn týyndylardyń dúnıege kelýine yqpal etý tıis.  

Sondaı-aq, «Sahnager» syılyǵy elimizdiń mádenı keńistigin biriktirip qana qoımaı, shyǵarmashylyq tájirıbemen turaqty almasý úshin jaǵdaı jasamaq. Ulttyq syılyq aıasynda jas daryndy ártisterdi qoldaýǵa erekshe nazar aýdarylatyn bolady.   

«Sahnager» syılyǵy kelesi nomınasıalar boıynsha úzdikterdi anyqtaıdy: «Jyldyń úzdik rejıseri», «Jyldyń úzdik qoıýshy-sýretshisi», «Jyldyń kostbm boıynsha úzdik sýretshisi», «Jyldyń jaryq boıynsha úzdik sýretshisi», «Úzdik áıel róli», «Úzdik er róli», «Jyldyń úzdik spektakli», «Jyldyń úzdik balalarǵa arnalǵan spektakli», «Jyldyń úzdik dramatýrgy», «Jyldyń úzdik grımeri», «Jyldyń úzdik teatr synshysy», «Spektákldiń úzdik mýyzkalyq rásimdelýi», «Teatr ónerin damytýǵa qosqan úlesi úshin», «Jyl ashýy», «Úzdik opera/balet partıasy». İrikteý týryna Qazaqstannyń 52 teatr ujymy qatysty.