27 naýryzda oblys ákimi Qumar Aqsaqalovtyń tóraǵalyǵymen ótken aparattyq keńeste birqatar mańyzdy máseleler qarastyryldy. Birinshi másele kóktemgi sý tasqynyna baılanysty boldy.
Tótenshe jaǵdaılar jónindegi departament basshysy Pavel Fılıppovtyń baıandamasy boıynsha 24 naýryzda Ishk ister vıse mınıstri Iýrıı Ilın Soltústik Qazaqstan oblysyna jumys sapary barysynda oblys aýmaǵynda sý tasqyny bolýy múmkin mekenderdi áýeden baqylap, kóktemgi sý tasqynyna baılanysty daıyndyqqa oń baǵasyn berdi jáne birqatar eskertýler jasady.
«Úlken Tarańǵul kólinen sýdy sıfondyq jolmen aǵyzý jumysy jetkiliksiz deńgeıde júrgizilgen. Osy ýaqytqa deıin Chırıkovka aýyly mańyndaǵy sý jınaıtyn kanaldy tazalaý jumystary jasalmaǵan», - dedi Pavel Fılıppov.
SQO-da 627 sý júrgizý qubyry bar, olardyń 580-i tazalanǵan. Aýdandyq mańyzy bar avtokólik joldarynda 879 qubyr nemese 98%-y tazalanǵan. Respýblıkalyq mańyzy bar avtokólik joldarynda 478 qubyr nemese 93%-y tazalanǵan.
Petropavlda 11,2 myń metr ashyq jaýyn-shashyn sýaǵarlary tazalanǵan.
Osy oraıda óńir basshysy Qumar Aqsaqalov qala ákimi Marat Tasmaǵanbetovten jaýyn-shashyn sýaǵarlaryn tazalaý boıynsha atqarylyp jatqan jumys týraly surap bildi. Oblystyq ortalyq basshysynyń aıtýynsha 1 sáýirge deıin tolyq tazartylady. «Budan basqa, ústimizdegi jyly Ekaterınbýrg qalasynan arnaıy mashınany jalǵa alamyz. Búgingi tańda Jambyl kóshesindegi sýaǵarlardy tazalaýǵa kiristi. 1100 metr tazartyldy», -dedi Marat Tasmaǵanbetov.
Oblys ákimi Petropavl jáne aýdan ákimderine tez arada sý jiberý qurylystary men sý aǵyzý kanaldaryn tazalaý jumystaryn aptanyń sońyna deıin aıaqtaýdy, eldi-mekenderden qar shyǵarý jumystaryn eki aýysymda uıymdastyrýdy, qaýipti aýmaqtarǵa ınertti materıaldardy, ydys-qaptardy, tehnıkany daıyndap qoıýdy tapsyrdy.
«Bizdiń maqsatymyz - halyqtyń qalypty tirshiligin qamtamasyz etý úshin barlyǵyn jasaý. Qardan tazartý, barlyq sý ótkizý qurylystaryn tazartý arqasynda jol tósemi saqtalady», - dedi Qumar Aqsaqalov.
Búgingi tańda jalpy alǵanda oblystyń eldi-mekenderinen 996 myń tekshe mert qar shyǵaryldy.
Sondaı-aq, keńeste oblystyń áleýmettik-ekonomıkalyq damýy men eldi-mekenderdi abattandyrý men sanıtarlyq tazalaý máselesi qarastyryldy.
Oblys basshysynyń oıynsha, negizgi maqsat jańa kásiporyndardy ashý men istep jatqan kásiporyndardy keńeıtý aıasynda jumys oryndardy ashý.
Jańa jumys oryndaryn ashý – bul ákimder jumysynyń basty kórsetkishi. Bul baǵytta jumys Tımırázev, Mamlút jáne Jambyl aýdandarynda nashar júrgizilýde.
Jınalysta ındýstrıaldy-ınnovasıalyq damý baǵdarlamasy da sóz etildi. Oblystyń Esil, Mamlút, Jambyl aýdandarynda baǵdarlamanyń ekinshi bes jyldyǵy boıynsha jobalar joq. Óńirde 2017 jyly 6 jobany iske qosý josparlanǵan. Oblys ákimi oblysqa ınvestısıalardy tartý boıynsha jaǵymdy jaǵdaı jasaý qajettigin atap ótti.
Keńeste aýyl sharýashylyǵy salasy máseleleri de qarastyryldy. Óńir basshysy dándi burshaqty daqyldaryn sebýdi 1,5 esege nemese 89 myń gektardan 130 myń gektarǵa deıin arttyrý maqsatyn qoıdy. «Ústimizdegi jyly bizge aýyl sharýashylyǵy aınalymyna 71 myń gektardan kem emes egistik jerdi tartyp, egistik jer quramyndaǵy egis aınalymyn 75-ten 80%-ǵa deıin arttyrý qajet», -dedi Qumar Aqsaqalov.
Sondaı-aq, oblys ákimi kezekti ret oblys ortalyǵy men aýla mańaıyn abattandyrý men sanıtarlyq tazalaý máselesine nazar aýdaryp, óńirdiń árbir azamatyn bul jumysqa tartý qajettiligin atap ótti.
