|
7 mamyr kúni Astanada elimizde buryn-sońdy bolmaǵan áskerı sherý ótedi. Sherýde bes myńnan astam sarbaz sap túzep, qarym-qabileti kúshti 200 áskerı tehnıka kórsetiledi. Al 80-ge jýyq ushaq pen tiqushaqtar avıashoýǵa qatysady. Iaǵnı QR Qorǵanys mınıstri, general-polkovnık Sáken Jasuzaqov kóshpeli jumys keńesin ótkizdi. QR Qarýly Kúshteri Bas shtabynyń habarlaýynsha, mazmundyq ıdeıasyna qaraı parad tarıhı jáne zamanaýı baǵyttaǵy eki bólimnen turady. Tarqatyp aıtsaq, tarıhı bólimde 1941-1945 jyldardaǵy soǵys tehnıkasynyń 36 túri qatysady. Onyń ishinde 27 áskerı tehnıka men qarý-jaraq, T-34 tanki, ZıL-157, ZIS-2 zeńbiregi jáne M-30 gaýbısasy, tanymal BM-13 RS-30 «Katúsha» jáne «Maksım» pýlemeti bar. Sondaı-aq, AN-2 jáne TL-2000 syndy 9 ushý apparaty Astananyń aspanynda qalyqtaıdy. Al zamanaýı bólimde búgingi qazaqstandyq armıa qarý-jaraǵyn quraıtyn qarýlar men áskerı tehnıkanyń úlgileri kórsetiledi. Áskerı qyzmetshiler eń sońǵy úlgidegi áskerı kıimderdi kıedi. |
Paradtyń taǵy bir ereksheligi Qazaqstan Qarýly Kúshteriniń ardagerlerin, Qorǵanys mınıstrliginiń ıeligine berilgennen keıin alǵash ret barabanshylardyń (daýylpazshylardyń) qurama rotasynda óner kórsetetin «Jas ulan» tórt áskerı mekteptiń tárbıelenýshileri, aýmaqtyq qorǵanys brıgadasynyń rotasy, áskerı-patrıottyq klýbtardyń tárbıelenýshileri men Áskerı-tehnıkalyq mekteptiń áskerı avtomobıldi tehnıkasynda alańda júrip ótetin Qorǵanys mınıstrligi áskerı-tehnıkalyq mektepteriniń shákirtterin qatystyrýǵa tartý bolyp tabylady.
Atalmysh is-sharanyń negizgi túıini áli qupıa retinde saqtalýda. Alaıda, Qarýly Kúshterde áskerı qyzmetshilerdi irikteý jáne tehnıkany daıyndaý bastalyp ta ketti. Áskerı parad – bul merekelik jáne kóztartarlyq is-shara ǵana emes, ol tól áskerimizdiń jaýyngerlik qýatyn, Qarýly Kúshterdiń tehnıkalyq turǵyda jabdyqtalýyn, elimiz ben halqymyzdyń egemendigi men qaýipsizdigin kúzetip júrgen áskerı qyzmetshilerdiń jaýyngerlik ázirligi men jaýyngerlik qabilettiligin kórsetý.
Budan buryn Qazaqstanda ótkizilip júrgen áskerı paradtardyń árqaısysy ózinshe aıryqsha jáne este qalarlyq bolyp keledi. Sońǵy jyldary ótkizilip júrgen paradtardyń ishinde 1941-1945 jj. Uly Otan soǵysyndaǵy Jeńistiń 70 jyldyǵyna arnalǵan 2015 jylǵy parad boldy. Onyń tarıhı jáne zamanaýı bóliginde Uly Jeńistiń murageri retinde UOS jyldary men qazirgi zamanǵy qazaqstandyq armıanyń áskerı tehnıkasynyń úlgileri usynyldy.
