Opozısıalyq «Saıası kalam. Trıbýna» gazetiniń bas redaktory bolǵan Janbolat Mamaı olıgarh Muhtar Ábilázovtiń qupıa túrde qarjylyq qoldaýyna ıe boldy dep aıyptalyp, abaqtyǵa toǵytylǵan edi. Alaıda, jýrnalıs ózine taǵylǵan aıypty moıyndamady. Muhtar Ábilázovtyń ózi de 2009 jyldan beri Eýropada bolǵandyqtan, Janbolat Mamaımen eshqashan kezdespegenin aıtqan.

Oı-pikir erkindigi quqyǵyn qorǵaý uıymdarynyń halyqaralyq jelisi (IFEX) qazaqstandyq jýrnalıs Janbolat Mamaıdyń qamalyp, qýǵyndalyp jatqanyna alańdaýshylyq tanytty, dep habarlaıdy Azattyq. IFEX Qazaqstan prezıdenti Nursultan Nazarbaevtyń atyna jazǵan úndeýinde Mamaıdy Almatydaǵy tergeý abaqtysynda qysym kórgeni týraly málimdemeni tergep, ony qýdalaýdy toqtatýǵa jáne oǵan qatysty sot prosesin ádil ótkizýge shaqyrdy. IFEX sonymen qatar málimdemesinde Mamaıdyń jubaıyna doq kórsetilgenin tergep, jýrnalıs pen onyń otbasynyń bolashaqtaǵy qaýipsizdigine kepildik berýge shaqyrdy.

Málimdemege 29 quqyq qorǵaý uıymy, onyń ishinde Almatydaǵy «Ádil sóz» sóz bostandyǵyn qorǵaý uıymy, «Artıkl 19», «Jýrnalıserdi qorǵaý komıteti», «Senzýra ındeksi» jáne basqa da uıymdar qol qoıǵan.

Aqpannyń sońynda Mamaı advokaty Janar Balǵabaeva arqyly Almatydaǵy tergeý abaqtysynda «basqa tutqyndar tarapynan soqqy jep, moraldyq qysym kórgenin» jetkizgen. Mamaıǵa kirip shyqqan Ulttyq preventıvtik mehanızm ókilderi bılikten onyń qaýipsizdigin qamtamasyz etýdi talap etken. Quramyna qazaqstandyq jýrnalıser men quqyq qorǵaýshylar kiretin Mamaıdy qorǵaý komıteti de onyń qaýipsizdigin qamtamasyz etýdi talap etken.