Qazaqstan halqynyń dostyǵy men birligi meıramynyń qarsańynda 1 jáne 2 mamyr kúnderi alǵash ret İ Halyqaralyq «Baýyrjan FEST» ázil festıvali ótedi dep habarlaıdy qamshy.kz.

Festıvál aıasynda 1 mamyr kúni Astana qalasyndaǵy «Qazaqstan» Ortalyq konsert zalynda jáne 2 mamyr kúni Almatyda Respýblıka Saraıynda eki konsert beriledi.

Festıvál reseılik áıgili «Krıvoe zerkalo» shoýynyń juldyzdary Karen Avanesán men Abıt Asomov, «Jooshbaı» ázil-satıra tandemi (Qyrǵyzstan), «Mırzo» ázil teatry (Ózbekstan), tanymal «Baýyrjan shoý», «Shanshar», «Aldaraspan», «Eki Ezý» ázil teatrlarynyń juldyzdary, «Nur-Muqasan», «MýzArt» trıosy, Marjan Arapbaeva jáne ózge de tanymal ártisterdiń qatysýymen ótedi.

Sondaı-aq, Festıvál aıasynda qaıyrymdylyq aksıalary, baspasóz konferensıalary, shyǵarmashylyq mamandyqtar stýdentterine arnalǵan ashyq leksıalar, trenıńter men vebınarlar ótkiziletini habarlandy.

Joba avtory halyq ártisi Baýyrjan Ibragımovtyń aıtýynsha, «Festıváldiń negizgi maqsaty – halyqty biriktirip, birtutas etetin qundylyqtardy ázil arqyly kórsete otyryp, dostyq pen bereke-birlik ıdeıalaryn nasıhattaý» bolyp tabylady.

«Festıvál alys jáne jaqyn sheteldiń áıgili ártisteriniń qatysýymen jyl saıyn ótkiziledi dep josparlap otyrmyz», – dedi B. Ibragımov.

Shoý túrli ázil janrlarynan quralǵan qazaq jáne orys tilderindegi qoıylymdardan turatyn bolady. Kórermen qaýym mýzykalyq jáne parodıalyq sahnalardy, mınıatúralar men qoıylymdardy tamashalaı alady. Ázil-syqaq salasynyń tanymal ártisteri konsert qonaqtaryn jańa qoıylymdarymen qýantary anyq.

İ Halyqaralyq «Baýyrjan FEST» ázil festıvali Qazaqstan halqynyń dostyǵy men birligi meıramynyń este qalarlyq bir kórinisi bolady.

Esterińizge sala keteıik, Qazaqstan Respýblıkasynyń Halyq ártisi Baýyrjan Ibragımov táýelsiz Qazaqstandaǵy estradalyq ázil-syqaq janrynyń negizin qalaýshylardyń biri retinde tanymal.

Baýyrjan Ibragımov – bıyl 25-jyldyǵyn atap ótkeli otyrǵan tanymal «Baýyrjan-shoý» ázil-syqaq shoýy arqyly halyqtyń ystyq yqylasyna bólengen ártis.