Qazaqstannyń Eńbek Eri, qoǵam qaıratkeri, jazýshy Oljas Súleımenovtiń aıtýynsha, qazaq halqy sanynyń óspeı qalǵanyna ekologıa da qatty áser etti, dep xabarlaıdy QazAqparat

"Máselen, 1926 jyly qazaqtyń sany 6 mıllıon 200 myń adam bolǵan. Sol kezdegi qujattarda qazaqtar túrki álemindegi sany eń kóp ári iri xalyq retinde kórsetilgen edi. Al ózbekterdiń sany 4 mıllıon boldy. Endi, qarańyz, araǵa 90 jyl salyp, qazaqtardyń sany 4 mıllıon adamǵa ósti. Qazir elimizde shamamen 10 mılllıon qazaq bar. Ózbek xalqy bolsa, 31 mıllıonǵa ósken. Negizi, olar da ujymdastyrýdan ótti, repressıalarǵa ushyrady. Alaıda, qazaq xalqy Semeı polıgony sıaqty úlken qasiretti bastan keshirdi. Oǵan kómir, munaı jáne taǵy basqa tabıǵat baılyqtaryn jabaıylyq ádispen óndirýdi taǵy qosyńyz. Bunyń bári xalyqtyń densaýlyǵyna áser etpeı qoımady. Qazirgi jastar arasynda bala taba almaı júrgender barshylyq. Ol da - buǵan deıingi ekologıalyq qatelikterdiń kesiri", - dedi Oljas Omaruly búgin Astanadaǵy xalyqaralyq ekologıalyq kongreste.

Onyń aıtýynsha, dál osy máseleni árbir mınıstr, árbir depýtat esten shyǵarmaýy qajet. "Qazaq xalqynyń ne sebepti jáne qandaı jaǵdaıǵa tap bolǵanyn qaperden shyǵarmaıtyn adam ǵana elge adal qyzmet etip, óz úlesin qosa alady", - dep atap kórsetti qoǵam qaıratkeri. Osy oraıda jazýshy árbir qazaqstandyqty bir tal aǵash egýge úndedi. Elimizde 18 mıllıonǵa jýyq aǵash otyrǵyzylsa, el ekologıasy ájeptáýir jaqsaratyn edi.