28 naýryzdan, ıaǵnı búginnen bastap bıometrıaly tólqujattary bar Grýzıa azamattary Shengen aımaǵyna ótý úshin vızany qajet etpeıtin bolady, dep habarlaıdy bbc.com.
Eýropalyq odaqqa ótý úshin vızasyz rejım qalyptastyrýǵa uzaq jyldar boıy atsalysqan Grýzıa eli Moldovadan keıin osyndaı úlken múmkindikke qol jetkizgen ekinshi memleket boldy.
Grýzıa azamattary qandaı memleketterge vızasyz óte alady?
Grýzıada vızasyz rejım kúshine engeli bıometrıaly tólqujattary bar azamattar 90 kúnnen 180 kúnge deıingi aralyqta Eýropanyń 30 memleketinde vızasyz turaqtaı alady.
Grýzıa azamattary Shengen aımaǵyndaǵy memleketterge ótýde vızany qajet etpeıdi. Sondaı-aq, aımaqqa kirýge úmitker memleketter, oǵan qosa EO-ǵa kirmeıtin Islandıa, Lıhtenshteın, Norvegıa, Shveısarıa elderine vızasyz kire alatyn múmkindikke ıe boldy.
Alaıda, Irlandıa jáne Ulybrıtanıa elderine kirý úshin Grýzıa azamattarynda ádettegideı vızanyń bolýy mindetti. Sondaı-aq, eýropalyq memleketterge oqý nemese jumys isteý maqsatynda uzaq ýaqytqa baratyn bolsa, azamatta vıza bolý kerek.
Shengen aımaǵyna shyǵarda ár Grýzıa azamatynda elge qaıtar bılet pen ýaqytsha saqtandyrýdyń bolýy talap etiledi. Sonymen qatar, ol azamattarda Shengen aımaǵynda bolǵan ýaqytta jetkilikti qarajattyń bolýy jaıynda qujattardyń bar-joǵy negizge alynady.
Grýzıa bıligi Shengen aımaǵyndaǵy memleketterge shyǵarda ár azamatta osy qujattardyń bolýyn eskertedi.
Vızasyz rejım tek týrısik, otbasylyq, sondaı-aq iskerlik saparlarǵa shyǵatyn azamattarǵa qatysty. Al, Eýropa memleketterine jumysqa ornalasý maqsatynda barǵan jaǵdaıda, vıza bolýy kerek.
Tbılısı bıligi Abhazıa jáne Ońtústik Osetıa turǵyndary da vızasyz rejımdi paıdalana alatynyn eskertken edi. Alaıda, keı memleketterdiń bıligi bul sheshimniń tek Grýzıaǵa qatysty ekenin alǵa tartyp, Abhazıa men Ońtústik Osetıa turǵyndaryna qatysy bolmaýy tıis ekenin eskertti.
Grýzıanyń keıbir týragenttikteriniń málimetinshe, vızasyz rejım ornaǵan soń eýropalyq memleketterge shyǵý jaıynda suranystyń kóbeıgendigi avıabıletterdiń baǵasyna da áser etpeı qoımady.
Love Travel týrısik agenttiginiń menedjeri Sofo Hıtarıshvalıdiń málimetinshe, byltyrǵy jylmen salystyrǵanda suranys 35 paıyzǵa ósken. Soǵan oraı, bılet quny 40 paıyzǵa deıin kóterildi.
Vızasyz tártip buzylǵan jaǵdaıda qandaı shara qoldanylmaq?
Eýropa memleketterine óterde tártip buzylmaýdyń joldary da qarastyrylyp, Grýzıa bıligi aqparattyq naýqan júrgizdi.
Grýzıa turǵyndary eýropa memleketterinde bolǵan ýaqytta bıliktiń nazarynda bolady. Eger Eýropada úsh aıdan kóp ýaqyt turaqtasa, grýzıalyqtar bul jaıynda Eýropalyq Odaqty habardar etedi. Sóıtip, tártipti buzǵan azamatqa izdeý salynyp, readmıssıa prosesi bastalady.
Shengen aımaǵyna vızasyz tártip arqyly shyqqan azamat tártip buzsa, 5 jylǵa deıin bas bostandyǵynan aıyrylýy múmkin nemese 3 myń evro kóleminde aıyppul tóleıdi.
Vızalyq rejımniń ornaýy Eýroodaqqa múshe bolmaq memleketter úshin saıası mańyzdylyǵy joǵary.
