Qazaqstan Parlamenti Senatynyń Tóraǵasy Qasym-Jomart Toqaev Sankt-Peterbýrgte Halyqaralyq terorızmmen kúres jónindegi parlamenttik konferensıada baıandama jasady dep habarlaıdy qamshy.kz QR Parlamenti senatynyń baspasóz qyzmetine silteme jasap.
TMD-ǵa qatysýshy qatysýshy memleketterdiń Parlamentaralyq Assambleıasy men EQYU Parlamenttik Assambleıasy uıymdastyrǵan forýmnyń kún tártibine qaýipsizdik jáne terorızmge qarsy is-qımyl salasyndaǵy halyqaralyq yntymaqtastyq, terorıstik áreketke qarsy qyzmettiń gýmanıtarlyq máseleleri, halyqaralyq qaýipsizdik júıesiniń ekonomıkalyq jáne áleýmettik negizderi engen bolatyn.
Q.Toqaev óz sózinde terorızmdi tek birlesken kúsh-jiger arqasynda ǵana túbirinen joıýǵa bolatynyna nyq senim bildire kelip, Prezıdent N.Nazarbaevtyń BUU aıasyndaǵy Jahandyq antıterrorıstik jeli qurý týraly bastamasynyń mańyzdylyǵyna forýmǵa qatysýshylardyń nazaryn aýdardy.
Konferensıaǵa qatysýshylarǵa arnaǵan sózinde Q.Toqaev halyqaralyq quqyqtaǵy «terorızm» uǵymynyń zańdy jáne saıası qısyndy anyqtamasyn berý qajettigi týraly aıtty. Tóraǵa eń kúrdeli máselelerdi jedel sheshýge yqpal etetin saıası úderisterge asyǵys ári aǵat baǵalaýdan shektelýge shaqyrdy.
«Mundaı qadamdardyń nátıjeli bolatynyn Sırıadaǵy qarýly qaqtyǵystardyń basynan beri oq atýdy toqtatý tetikterin qurýǵa jetkizýge alǵash ret múmkindik bergen Astana kelissózderi pash etip otyr», - dep atap ótti Senat Tóraǵasy.
Q.Toqaev birde bir el qaýpinen qorǵalmaǵan kıberterrorızm máseleleri týraly da aıtty: «Adam quqyqtary men bostandyqtaryn qurmetteýdiń mańyzdylyǵyn tolyq túsingen jaǵdaıda qaýipsizdikti qamtamasyz etý úshin ınternetti retteý máseleleri boıynsha oılanýdyń máni zor. Basty maqsat – ekstremızm ıdeıasyn nasıhattaýǵa jáne jastardy terorıstik uıymdardyń qataryna aldap-arbap tartýǵa kedergi jasaý bolyp otyr».
Baıandamada kedeılik, saýatsyzdyq, sybaılas jemqorlyq, azamattardyń quqyqtary men bostandyqtaryn shekteý sekildi terorızmniń bastapqy sebepterin joıýdaǵy zań shyǵarý organdarynyń áleýetine erekshe nazar aýdaryldy. Q.Toqaev EQYU Parlamenttik Assambleıasy sesıalarynyń birinde Ekstremızm jáne terorızmge qarsy is-qımyl jónindegi uıymnyń Úılestirý ortalyǵyn qurý týraly máseleni qaraýdy usyndy.
Qazaqstan Parlamenti joǵarǵy Palatasynyń basshysy radıkalızm qaterlerine qarsy ıdeologıalyq is-qımylda Álemdik jáne dástúrli dinder lıderleriniń Seziniń de mańyzdylyǵyn atap ótti, sondaı-aq Astanada 2016 jyly 31 mamyrda ótken, joǵary mártebeli dinı qaıratkerler, birqatar elderdiń parlamentshileri jáne ǵalymdar qatysqan «Dinder terorızmge qarsy» halyqaralyq konferensıanyń qorytyndylary týraly forýmǵa qatysýshylardy habardar etti.
Q.Toqaev qazirgi zamandaǵy reformalar men halyqpen ashyq dıalogty terorızmge qarsy pármendi sharalar retinde atap ótti. Bul turǵyda memlekettik basqarýdy jetildirý jáne bılik tarmaqtary arasyndaǵy ókilettikterdi qaıta bólý arqyly zań ústemdigin nyǵaıtýǵa baǵyttalǵan Qazaqstandaǵy konstıtýsıalyq reformalardyń mańyzdylyǵy aıtyldy. Tóraǵa «Terorızmge qarsy is-qımylǵa qatysty aıtqanda, Konstıtýsıaǵa terorıstik áreketke qatysqany úshin Qazaqstan azamattyǵynan aıyrý týraly jańalyq engizildi», - dedi.
Senat Tóraǵasy sóziniń sońynda terorızmdi oqshaýlaý tájirıbesinen ony jappaı túbirinen joıý strategıasyna kóshý - jiti nazar aýdarýdy, dıalog pen ózara is-qımyldy talap etetin kúrdeli ári jaýapty jumys ekenin atap ótti.
Q.Toqaev Eýropa Keńesi Parlamenttik Assambleıasynyń Tóraǵasy Pedro Agramýntpen áńgimelesti. Tóraǵa Qazaqstannyń EKPA-men yntymaqtastyǵynyń syndarly sıpatyna toqtaldy. Bizdiń elimiz Eýropa Keńesiniń birqatar mańyzdy konfensıalaryna qatysýshy, Demokratıa jolyndaǵy Eýropanyń quqyqtyq komısıasynyń (Venesıa komısıasy) tolyq múshesi. Qazaqstan Parlamenti men EKPA yntymaqtastyq týraly kelisimge qol qoıdy. Qazaqstandyq depýtattar Strasbýrgte EKPA sesıalarynda turaqty túrde qatysady. Q.Toqaev demokratıany damytý, gýmanıtarlyq yntymaqtastyq jáne qaýipsizdiktiń jańa qaterlerine qarsy is-qımyl úshin dıalog pen nátıjeli yntymaqtastyqty jalǵastyra berý kerek dep sanaıdy.
Senat Tóraǵasy EKPA basshysyn Prezıdenttiń ókilettikterin Parlament pen Úkimetke berý jónindegi Qazaqstandaǵy konstıtýsıalyq reformalar týraly habardar etti.
