Arystanbek Muhamedıulynyń aıtýynsha, qazaqstandyqtarǵa sheteldik ánshi Rıannanyń esh qajeti joq, dep habarlaıdy Informbúro, málimettiń qazaqsha nusqasyn «Qamshy» portaly oqyrman nazaryna usynady.

Mádenıet mınıstri Arystanbek Muhamedıuly EKSPO qarsańynda Astana qalasynda  Rıannanyń ótýi múmkin konsertine qatysty málimdeme jasady.

«Rıannanyń eshqandaı da konsertin biz uıymdastyryp jatqan joqpyz. Biz Dımash Qudaıbergenovty, Qanat Islamdy, La Scala, Plasıdo Domıngo jáne basqalaryn uıymdastyryp jatyrmyz», - dep málimdedi ol.

BAQ ókilderi Mınıstrliktiń saıtynda jarıalanǵan Rıannanyń konsertine qatysty aqparatty tekserip kórdi. Mınıstrdiń oıynsha, tehnıkalyq qatelikter jiberilgen bolýy múmkin.

«Bul – tehnıkalyq qatelikter shyǵar, bulaı bolýy múmkin emes. Bálkim, bireý mundaı aqparatty ádeıi júktep qoıǵan. Shynymdy aıtsam, barlyq uıymdastyrý sharalarymen ózim aınalysyp jatyrmyn. Rıannanyń bizge ne qajeti bar? Mınıstrlikke júktelgen mindet – EKSPO-nyń uıymdastyryp jatqan barlyq sharalary, bul iske barlyq qala jáne biz birlesip jumys atqaryp jatyrmyz», - dep túsindire ketti Arystanbek Muhamedıuly.

Barlyq baǵdarlamalardyń jıyntyǵyna «Astana EKSPO-22017» AQ jaýapty ekenin aıtyp ótti.

«Múmkin bul jınaqta Rıannanyń konserti turǵan bolar. Bul – jalpy baǵdarlamalardyń jıyntyǵy», - dedi Mádenıet Mınıstri.

Sonymen qatar, ol basshylyq etip otyrǵan bólim Rıannanyń konsertin uıymdastyrýshylar emes ekenin qosa aıtty.

«Ony Mádenıet Mınıstrligi ótkizbeıdi», - dedi Mınıstr.

Esterińizge sala ketsek, Mádenıet jáne sport Mınıstrliginiń saıtynda 6 shilde kúni Rıannanyń konserti ótedi degen aqparat jaryq kórgen bolatyn.

Birneshe ýaqyttan soń saıt betindegi aqparat joǵalyp ketti, al Mádenıet Mınıstrligi Astana qalasynda Rıannanyń konserti ótpeıtindigin habarlady.

Aýdarǵan: Nazerke Labıhan