Áskerde boryshyn ótep júrgen 14 sarbazdy óltirgen Chelah búgingi ómiri týraly aıtyp berdi. Ol túrmede ıogamen aınalysyp, túrli kitaptar oqyp júr eken. Munymen qatar, ol áli de burynǵy súıiktisimen birge bolýǵa dámeli ekenin jetkizdi, dep jazady Stan.kz

5 jyl buryn «Arqankergen» aımaǵynda bolǵan qandy oqıǵa jurtty shýlatty. Resmı derekter boıynsha, Chelah 14 adamdy atyp óltirip, artynsha kazarmany jaǵyp jibergen. Tártip saqshylary ony oqıǵa ornynan 20 km jerden taýyp alǵan. Sot ony aıypty dep tanyp, ómir boıy bas bostandyǵynan aıyrǵan bolatyn. Búginde ol elimizdegi qatań rejımdegi túrmelerdiń birinde otyr. Osy kúnge deıin qaıǵyly oqıǵa aınalasyndaǵy daý tolastar emes. Chelahtyń anasy áli kúnge deıin onyń kináli ekenine senbeı júr.

Svetlana hanym jylyna birneshe ret ulyna kelip turady. Basqa ýaqytta únemi hat jazysyp otyrady. Biraq Chelah sol kúngi qaıǵyly oqıǵa týraly múldem jazbaıdy eken. Anasy tilshilerge ulynyń hatyn berip, onyń qalaı ómir súrip jatqanyn bólisti. Vladıslav Chelah búginde ıogamen aınalysyp, kóp kitap oqyp júr eken.

«Anashym, sálem! Seniń hatyńdy aldym. Qatty qýanyp qaldym. Shyny kerek, úıden kelgen árbir hat maǵan qýanysh syılaıdy. Sizder úshin qatty ýaıymdaımyn. Qazir ne istep júrsizder? Densaýlyqtaryńyz qalaı? Sashajan seniń júregińniń aýyryp júrgenin aıtty. Sen men úshin bulaı qatty alańdama. Meniń jaǵdaıym óte jaqsy. Tirimin, densaýlyǵym da jaqsy. Júrekpen oınaýǵa bolmaıdy. Dárigerge baryp qaral. Bálkim keńes berer. Aıtpaqshy júıkemdi tynyshtaldyrý úshin ıogamen aınalysa bastadym. Jurt onyń kómektesetinin aıtyp jatyr.

Pasha men ákemniń jaǵdaıy she? Olar ne istep júr? Ákeme de hat jazdym. Anashym, maǵan ákemniń elektrli ustarasyn berip jibershi. Saqal-murtymdy nemen qyrarymdy bilmeımin. Eń bastysy, júıkeńdi tozdyrma. Menen bólek Sasha men Pasha bar ekenin umytpa. Sen bizdiń perishtemizsiń. Sen bolmasań, bul jalǵanda aıaq basyp júre almaıtyn edik. Anashym, seni qatty jaqsy kóremin. Qushaqtap, betińnen súıdim. Sendersiz qınalyp júrgenim ras. Múmkindigim bolsa, moraldyq, materıaldyq turǵydan kómektesetin edim. Átteń, tek moraldyq turǵydan septigimdi tıgize alamyn. Kezdesýlerimiz kóp bolýy úshin barynsha tártipti bolyp júrmin», – deıdi ol anasyna jazǵan hatynda.

Munymen qatar, Svetlana hanym ulynyń qaryndasyna jazǵan hatyn usyndy. Ol áli de bostandyqqa shyǵýǵa úmittenip júrgenin jetkizgen eken. «Sálem, kishkene ǵana qaryndasym! Sýretiń men hatyńdy aldym. Sen sondaı sulý bolyp ketipsiń. Maǵan dál osyndaı hatty jıi jazyp turshy. Olardy oqyǵan unaıdy. Sońǵy kezde kitap oqýǵa qumartyp júrmin. Bostandyqta júrgen kezde kitap oqýdyń munshalyqty jaqsy ekenin bilmeppin. Biraq syrtta kitap oqýǵa da ýaqytym joq edi ǵoı. Endi ótken shaqtaǵy qatelikterdi qolǵa alyp, barlyǵyn qatar oqyp jatyrmyn.

Bostandyqqa shyqsam, dál bulaı jata-jastana kitap oqýǵa múmkindigim bolmaıdy. Jýyrda teledıdardan Sochıde úlken «tarzankanyń» bar ekenin estidim. Bıktigi – 280 metr eken. Kózderim jaınap ketti. Men Ianaǵa (Chelahtyń súıiktisi) jabysyp qalǵanym joq. Men ony shyn máninde súıemin. Ǵashyq bolǵan soń meniń jaǵdaıymdy tolyqtaı túsinetin bolasyń. Bul sezim seni bıikterge jetelep, barlyq shekarany buzady. Súıgenińnen basqa eshkimdi oılaǵyń kelmeı qalady. Onyń turmysta bolǵany maǵan kedergi keltirmeıdi. Týǵan qyzy mendik bolýy da múmkin edi. Ógeı bala bolmaıdy», – deıdi Chelah qaryndasyna jazǵan hatynda.

Qylmyskerdiń ómirinde erekshe oryn alatyn taǵy da bir áıel adam bar. Ol – qandy oqıǵaǵa deıin júrgen súıiktisi. Alaıda Iana Vladıslavty birjolata ómirinen syzyp, búginde turmysqa shyqqan. Kúıeýi ekeýi bir qyz tárbıelep otyr.

«Tańerteń oıanǵan kezde de, túnde uıyqtaǵanda da seni eske alamyn. Seniń bul jalǵanda bar ekeniń úshin sheksiz qýanamyn. Sen maǵan jaqyn jerde júrsiń. Men úshin alańdaıtynyńdy sezemin. Seniń meni oılap júrgenińdi, meni kerek qylatynyńdy jaqsy bilemin. Sen kúıeýińdi tastamaıtynyńdy aıtyp otyrsyń. Biraq men bostandyqqa shyqqan jaǵdaıda barlyǵy basqasha bolar ma edi?! Men buǵan senimdimin. Onyń ústine seni ózim de ekinshi ret eshqaıda jibermeıtin edim. Seniń basqa azamattyń qushaǵynda jatqanyńdy moıyndaı almaımyn. Mundaı jaman oılardan aýlaq bolýǵa tyrysamyn», – deıdi Chelah.