Geılerdiń quqyqtaryn shekteýge qatysty zań qabyldaý – bul dıskrınımasıa. Mundaı pikirdi Almaty qalasynda «Bolashaq» qozǵalysy men LGBT-qaýymdastyǵy músheleriniń bas qosýynda LGBT múshesi aıtqan. Bnews.kz bul týrady Almaty telearnasyna silteme jasap habarlady.

«Ókinishke qaraı, biz qazir LGTB-shylardyń óz orıentasıasyn jasyrmaıtyn kúnge jettik. Mundaı adamdardy qala ortalyǵyndaǵy saýda oryndarynda nemese qoǵamdyq oryndarda kóptep kezdestiretin boldyq – túrli-tústi shalbar kıgen jastar ózderiniń orıentasıasyn jasyrmaıtyn bolǵan», - dep ashynǵan «Bolashaq» qozǵalysy jetekshisi Dáýren Babamuratov. Sonymen qatar, ol kúı atasy Qurmanǵazy men Pýshkındi súıistirip qoıǵan jarnama posterine qatysty tutanǵan daý-damaıǵa, bylaıǵy jurttyń narazylyq tanytqanyna el bıliginiń nazar salmaǵanyna qynjylys bildirdi. Dáýren Babamuratov qozǵalys múshelerimen birge «Qazaqstanda LGTB-ny nasıhattaýǵa tyıym salý týraly» zań qabyldaýdy talap etetin úndeý ázirlegen. Onyń aıtýynsha  álemniń ondaǵan elinde mundaı zań qabyldanǵan. «Bolashaq» músheleri LGTB-shylardy memlekettik qyzmetke almaýdy jáne Qazaqstan qarýly kúshteriniń qataryna shaqyrmaýdy talap etpek. Osy jıynǵa qatysqan «Aq jol» partıasynyń ókili ári saıasattanýshy Maqsat Jaqalov sóz alyp: «Biz olardy túsinýimiz kerek, olardy qylmyskerler qataryna jatqyzbaý qajet. Alaıda, bizdiń qoǵamymyzda mundaı qatynas ashyq kórsetilmeýi tıis. Ár nárseniń shegi baryn bile júrgenimiz durys. Bálkim, zań qabyldanbaıtyn shyǵar, dese de munyń bári dabyl qaqqanymyz dep túsinińizder», - degen.

Qamshy-aqparat