Qazaq kóshiniń qamqorshysy Nursultan Nazarbaevtyń,
Úkimet basshysy Baqytjan Saǵyntaevtyń,
Joǵarǵy sot tóraǵasy Qaırat Mámıdiń,
QR bas prokýrory Jaqyp Asanovtyń nazaryna
Atajurtqa kóship kele jatyp, «Maıqapshaǵaı» shekara beketinen óter kezde bar aqshasynan aıyrylǵan Máýithan Gúljannyń basyndaǵy qıyn jaǵdaı jalpy jurtqa aıan. Onyń Qazaqstannan úı alamyn dep, Qytaıdaǵy búkil kapıtalyn aınaldyrǵan aqshasyn shekarashylar tartyp alǵan.
Shekaradan ótken eki kishkentaı balamen qosa eseptegende jeti adamnyń qaltasynda jalpy jıyny 59,900 AQSH dollary bolǵan. Iaǵnı, Máýithan Gúljannyń ózinde - 19,700, birge týǵan inisi Máýithan Muqıattyń qaltasynda - 10,500, uly Muqtashuly Ádilbektiń janynda - 9,900, jıeni Saılan Meırambektiń qaltasynda - 9,900, jıen kelini Gúljanat Soltikenniń qaltasynda 9,900 AQSH dollary bolǵan.
Oqıǵa aqpan aıynyń basynda oryn alyp, másele týraly naýryz aıynda aqparat quraldary jazdy. Qazaq tildi BAQ ókilderiniń bárinde derlikteı másele kóterildi.
Erteń, 10 sáýir kúni Zaısan aýdandyq sotynda «Maıqapshaǵaı» kedendik beketinde 49 990 dollarynan aıyrylyp qalǵan qandasymyz, Gúljan Máýithannyń isi qaıta qaralady. Bul iske BAQ ókilderi ǵana emes, el aldynda júrgen tanymal azamattar da alańdaýshylyq tanytyp otyr. Zańger Abzal Quspan, qoǵam qaıratkeri Muhtar Taıjan, Saıasattanýshy Erlan Saırov jesir ananyń taǵdyryna alańdap, birneshe post jazdy.
Shyndyǵynda, Máýithan Gúljan jalaly habardaǵydaı kontrobandamen aınalysqan qylmysty emes. Ol – Elbasynyń uly saıasaty arqasynda Atajurtqa kóship kele jatqan ana.
«Meniń estýimshe, sottyń betalysy ol kisilerdi kináli jasap, búkil tapqan-taıanǵanyn tárkileýge bet alyp kele jatqan tárizdi. Prokýratýra ókilderi de, shekara ókilderi de "is-árekettiń" dáleldengenin ýáj etip, jesir anany múldem qarjysyz qaldyrýǵa "myǵym" kirisip otyr-mis. Erteńgi kún, sottyń sheshimi, barlyǵymyzdyń ar-ujdanymyzǵa syn. Men, osy kisilerdiń bizdiń jaqtyń zańyn bilmegendikten, bir qate jiberdi degenge de senemin. Biraq, osyndaı aýyr jaǵdaıda sot, prokýratýra ókilderi formaldy "jińishke" zań aıasynan emes, gýmanıtarlyq, adamgershilik turǵysynan qarastyrýdy ótinemin. Elimizde terıtorıalyq, demografıalyq damý úshin qandastarymyzdyń kóshi toqtamaý qajet. Bul aksıoma! Sondyqtan, elim-jerim dep ańsap kelgen qandastarymyzdy osyndaı áreketpen syrtqa tebý tarıhta keshirilmeıtin kúná! Osy turǵyda, barlyǵymyz jabylyp, osy máseleni oń sheshýge at salysýǵa shaqyramyn!
Bas prokýratýranyń basshysy J. Asanov myrzaǵa, Joǵary Sot tóraǵasy Q. Mámı myrzaǵa osy máselege tikeleı aralasýyn ótinemin. Keı kezderi moral zańdylyǵy, memleket zańymen teńdesedi. Osy jaǵdaı, dál sol kezeń dep esepteımin! !». Bul saıasattanýshy Erlan Saırovtyń búgingi jazbasy.
13 aqpanda Shyǵys-Qazaqstan oblysy boıynsha Memlekettik kirister Departamenti jarıalaǵan materıaldaǵy vıdeodan da kóretinimizdeı shekaradan ótip kele jatqan qandastardyń úreı ishinde ekeni baıqalady. Árıne, 60 myń dollar az qarajat emes. Byltyrǵy jyly Almaty obylysyndaǵy Uzynaǵashta bolǵan mal saýdasymen aınalysqandardyń ólimi týraly aqparat Qytaı qazaqtaryn aıtarlyqtaı úreılendirip tastaǵan. «Qarjysy mol kisilerdi tonap ketedi, kisi óltirýden taıynbaıdy» degen túsinik qalyptasyp qalǵan. Sondyqtan da kóship kele jatqan kisilerdiń aqshasyn aıaq kıimge nemese basqa da kisi baıqaı qoımaıtyn jerlerge saqtaýy qısyndy.
Al, jesir ananyń aqshasyn ǵana alyp qoımaı, oǵan aqsha kontrabandasymen aınalysty dep aıyp taǵý bizdiń memlekettigimizge syn. Almaty oblysyndaǵy jaǵdaı sıaqty, Keden beketindegi jaǵdaı da sheteldegi qazaqtardyń Atamekenge kelýine aıtarlyqtaı keri áserin tıgizetini sózsiz.
Jaqynda ǵana «Qamshy» poshtasyna tómendegideı hat kelip tústi. Qulja qalasynan hat joldaǵan Asylbek esimdi azamat:
«Men tarıhı otanym Qazaqstanǵa kóship barǵym keledi, Qytaıdan Qazaq eline ketýge tolyqtaı daıyndalyp boldym, ata-anamnyń bergen enshisin, aq batasyn aldym. Endi óz otanymda ómir súrgim keledi, bul meniń 8 jyldan bergi kele jatqan armanym.
Qazaq eline kelý úshin ata-anam bergen enshimen qosa búginge deıin jınaǵa kapıtalym jıyny 870000 qytaı aqshasy (40 mıllıon teńge) kólemindegi qarjymdy qalaı Qazaq eline alyp ótýim kerek?
Jaqynda ǵana Qytaıdan kóshken Qazaq anamyzdyń 50myń dollaryn Qazaq shekara qyzmetshileri tárkilep alypty degen aqparat qytaıdaǵy áleýmettik jelini jaýlady. Qytaıda men ǵana emes Atajurtqa nıettenip teńin býyp otyrǵan qanshama qandastar bar. Olardyń bári de qarajaıaý emes. Búginge deıin ter tógip tapqan azdy-kópti qarjysyn Atamekenge aparyp kádege jaratpaq. «Óz aqshamyzdy shyrǵasyn shyǵarmaı alyp óte alamyz ba? Qazaq elinen óz nanymdy taýyp jeı alam ba? ... Joq álde Qazaq elindegi shekara qyzmetkerlerine «Kók týdyń kórimdigi» dep berem be?» degen suraq meni qatty mazalaıdy» depti. Biz bul hatqa Qazaq eliniń zańy árqashan ádildiktiń jaǵynda ekenin aıtyp jaýap jazdyq...
Iá, erteńgi sottyń sheshimi jesir ana Máýithan Gúljannyń ǵana emes, Atajurtqa kóshemiz dep at-kóligin saılap otyrǵan biraz qandastyń taǵdyryn, tipti Elbasy Nursultan Nazarbaevtyń «Nurly kósh» saıasatynyń da taǵdyryn sheshpek...
Sondyqtan tıisti quzyrly mekemelerden Qandastardyń aýyr jaǵdaıyn, múshkil halyn tyńdar qulaq tabylyp, quqyqtyq kómek beredi, istiń oń nátıjemen aıaqtalýyna yqpal etedi degen senimdemiz.
Nurǵalı Nurtaı
