Jyl sońyna deıin hıdjab kıýge zań júzinde tyıym salynýy múmkin. Bul týraly Astana arnasynyń tilshisine bergen suhbatynda Din isteri jáne azamattyq qoǵam mınıstrliginiń ókili Baqyt Kúlekeev aıtty, dep jazady Qamshy aqparattyq agenttigi Astana jańalyqtaryna silteme jasap.
Onyń aıtýynsha, ózge eldiń ulttyq kıimin kıetin negizinen Atyraý, Aqtóbe men Almaty oblysynyń qyz-kelinshekteri. Qazir mınıstrlik mamandary zańǵa ózgerister men tolyqtyrýlar engizýdi qolǵa alǵan. Qujat jyldyń sońyna deıin úkimetke usynylatyn kórinedi.
Baqytjan Kúlekeev, QR Din isteri jáne azamattyq qoǵam mınıstrligi din isteri komıteti tóraǵasy mindetin atqarýshy:
«Elbasymyzdyń aıtylǵan sózinen keıin tıisti tapsyrma keledi. Qazirdiń ózinde bul másele biz kóńil aýdaryp, zertteýdemiz. Árıne, tyıym salyna ma? Qandaı túrde, qandaı deńgeıde salynady? Onyń barlyǵyn oılastyrý kerekpiz. Al zańnamalyq ózgeristerde qaraımyz. Memlekettik organdardyń pikirin jınaqtap, sol kezde enýi múmkin».
Eske sala keteıik, 19 sáýirde Nursultan Nazarbaev Qazaqstan musylmandary dinı basqarmasynyń ókilderimen kezdesti. Kezdesýge Qazaqstan Respýblıkasynyń Prezıdenti Ákimshiligi basshysynyń birinshi orynbasary M.Tájın, Din isteri jáne azamattyq qoǵam mınıstri N.Ermekbaev, Qazaqstan musylmandary dinı basqarmasynyń tóraǵasy, Bas múftı E.Maıamerov, ımamdar – K.Dúısenbaı, N.Esmaǵanbet, N.Aýysqanuly, A.Kerimbek, T.Ospan qatysty. Elbasy qatysýshylarǵa arnaǵan sózinde Qazaqstan halqynyń ómirinde dinniń erekshe ról atqaratynyn atap ótip, memleket tarapynan dinı qarym-qatynastardy retteý úshin qabyldanyp jatqan sharalarǵa toqtaldy.
Sondaı-aq forýmda Elbasy jas urpaqtyń dinı saýatsyzdyǵyna aıryqsha nazar aýdaryp, bylaı degen:
«Dinı saýatsyzdyǵynyń nátıjesinde jastarymyz saqal qoıyp, shalbarynyń balaqtaryn qysqartyp tastaıdy. Qara kóılek kıip, beti-aýzyn tumshalaǵan qyzdarymyzdyń qatary kóbeıdi. Bul bizdiń dástúrimizge de, halqymyzǵa da jat. Buǵan zańnamalyq deńgeıde tyıym salý máselesin pysyqtaý kerek. Qazaq qara kıimdi qaraly kezde ǵana kıedi».