2017 jylǵy 21 sáýirde Beırýt qalasynda QR Iordanıadaǵy Elshisi Azamat Berdibaı Lıvan Respýblıkasynyń Prezıdenti Mıshel Aýnǵa Lıvan Respýblıkasyndaǵy Elshi qyzmetin qosa atqarýshy retinde senim gramotalaryn tabys etti, dep habarlaıdy Qamshy aqparattyq agenttigi QR SİM baspasóz qyzmetine silteme jasap.
Kezdesý barysynda otandyq dıplomat M. Aýnǵa QR Prezıdenti N.Á. Nazarbaevtyń iltıpatyn jetkizip, Qazaqstandaǵy qazirgi áleýmettik-ekonomıkalyq jaǵdaı, sondaı-aq elimizdiń aýqymdy halyqaralyq bastamalary jóninde habardar etti. Sondaı-aq A. Berdibaı Lıvan Prezıdentiniń ú.j. 10-11 qyrkúıekte Astanada ótetin Islam yntymaqtastyǵy uıymynyń Bilim jáne tehnologıalar jónindegi birinshi samıtine qatysýyna senim bildirip, Qazaqstan-Lıvan qarym-qatynastaryn nyǵaıtý jáne ilgeriletý sharalarymen tanystyrdy.
Lıvan Prezıdenti dostyq jáne ózara senimge negizdelgen baılanystardy damytýǵa baǵyttalǵan barlyq bastamalardy qoldaıtynyn qýattady.
Elshi A. Berdibaıdyń Beırýt qalasyna jasaǵan sapary sheńberinde Lıvannyń Syrtqy ister mınıstri Djýbran Basıl jáne SİM-niń Bas hatshysy Sharbel Ýahbemen kezdesýleri ótti. Suhbat aıasynda taraptar Lıvan Prezdentiniń IYU Ǵylym jáne tehnologıalar samıtine qatysý, eki eldiń syrtqy ister mınıstrlikteri arasynda saıası konsýltasıalar ótkizý, ekijaqty qatynastardyń sharttyq-quqyqtyq bazasyn keńeıtý, múddeli mınıstrlikter men vedomstvalar arasynda ózara saparlar uıymdastyrý múmkindikteri jóninde pikir almasty.