19 sáýirde Nursultan Nazarbaev Prezıdent janyndaǵy Qoǵamdyq sanany jańǵyrtý baǵdarlamasyn iske asyrý jónindegi ulttyq komısıany qurý týraly Jarlyqqa qol qoıdy. Rýhanı jańǵyrtý boıynsha baǵdarlamany iske asyrý jónindegi ulttyq komısıany basqarý Ádilbek Jaqsybekovke tapsyryldy. Ádilbek Ryskeldiuly bir aı buryn Konstıtýsıalyq reformalar boıynsha komısıany basqaryp, nátıjeli jumys júrgizgen bolatyn. Jaqsybekov bastaǵan komısıa Konstıtýsıanyń 91-babynyń 2-tarmaǵynyń redaksıasyna memlekettiń Táýelsizdigin, Respýblıkanyń birtutastyǵy men aýmaqtyq tutastyǵyn ózgertýge tıym salatyn tolyqtyrýlardy engizip, Parlamentten ótkizip, ol redaksıany prezıdent qoldap, qolyn qoıǵan bolatyn.

Ádilbek Jaqsybekov memleketshil tulǵa ekenin prezıdent apparatynyń qyzmetkerleri, ár jyldary onyń qol astynda qyzmet etken áriptesteri aıtyp júredi. Jaqsybekov memlekettik mańyzdy máseleler boıynsha óte prınsıpshil bolyp keletininiń taǵy bir myna fakt kórsetedi. 2008 jyldyń aıaǵynda Jaqsybekov Reseı Federasıasyna elshi bolyp taǵaıyndalǵan kezde, Kremlmen kelissóz júrgizý, Reseı aldynda ulttyq múddeni qorǵaýdyń dıplomatıalyq aýyr júgin arqalaý Ádilbek Ryskeldiulynyń moınyna tústi. Degenmen, bul dıplomatıalyq jumysty abyroımen atqaryp júrgen ony, qorǵanys mınıstri etip taǵaıyndady.
Jaqsybekov qorǵanys mınıstrliginde de úlken jumys atqaryp, Qazaqstannyń tarıhynda tuńǵysh jaýyngerlik parad uıymdastyryp, qazaq qarýly kúshteriniń áleýetin, daıyndyǵyn pash etti. Bul jaýyngerlik paradty jerimizge kóz alartyp otyrǵan kúshterge ses kórsetý úshin uıymdastyrylǵanynyń sol kezde sarapshylar aıtyp, qoǵam jaqsy qabyldaǵany belgili.

Jaqsybekov joǵarǵy deńgeıdegi myqty saıası uıymdastyrýshy retinde prezıdenttiń ár tapsyrmasyn muqıat oryndaı biletin tulǵa. Rýhanı jańǵyrtý boıynsha baǵdarlamany iske asyrý jónindegi ulttyq komısıany Jaqsybekov basqaratyny - bul baǵdarlamany iske asyrýyn naqty tetikteri iske qosylǵanyń bildiredi. Ádilbek Jaqsybekov qazaq qoǵamy arasynda asa qatty tanylmasa da, qazaq memleketiniń ulttyq múddesine «úndemeı júrip is tyndyratyn iskerlik qasıeti» ony saıası olımp bıiginde únemi tanymal etip ustaıdy. Prezıdenttiń de Jaqsybekovke senim artyp otyrǵan syry osynda jatyr.
Nurǵalı Nurtaı