Sáýirdiń 22-shi juldyzynda Astanada qalalyq Tilderdi damytý basqarmasynyń uıymdastyrýymen «Kórkemsóz oqý sheberleriniń baıqaýy» ótti. Memlekettik tildiń qoldaný aıasyn keńeıtýdi, til mádenıetin kóterýdi, kórkem ádebıetti nasıhattaýdy, talantty jastardy tabýdy maqsat etken baıqaýǵa 17-29 jas aralyǵynda úmitkerler qatysty.
Baıqaý jaıynda kezdeısoq estip, oǵan kórkem shyǵarmany oqý mánerimen kózge túsip júrgen Gúlsezim Álisher esimdi shákirtimizdi qosýdy oıladyq. Baǵyńdy synap kóresiń be degenimizde, baıqaýǵa eki-aq kún qalǵanyna qaramastan Gúlsezim kelisti. Osylaısha, elýden astam úmitker tirkelgen sóz saıysynyń aqtyq synyna 13 talapker iriktelip, sonyń arasynda ýnıversıtet atynan barǵan Gúlsezimniń de ótkenine qýandyq.

Poezıalyq shyǵarma retinde buryn jattaǵan aqyn Ábdilda Tájibaevtyń tanymal týyndysyndaǵy Mánshúk batyrdyń monologyn oqýǵa toqtadyq. Al proza degende, Alashtyń 100 jyldyǵynda Alash qalamgeriniń sózin sahnalaýdy uıǵardyq. Shákirtimizge Maǵjanyń «Saǵyndym» óleńimen bir jylda, bir qalada, bir tarıhı jaǵdaıda jazylǵan, áıgili jyrmen úndesetin qalamger Qoshke Kemeńgerulynyń «Tutqynnyń oıy» áńgimesin oqýdy usyndyq.
Kezegi kelip sahnaǵa shákirtimiz shyqqanda báıgege júırigin qosqan atbeginiń kúıin keshkendeı bolǵanymyzdy jasyra almaımyz. «Jazyqsyz jaralandym, tutqyn boldym. İshi – qandy muz, syrty – jyly kólgir, haıýan minezdi, adam perneli jaý aldap tuzaqqa túsirdi. Qandaı tuz ashshy beınetpen tapqan múlkimdi aldy. En jaılap, erkin ósken mekenimdi aldy. Bárinen de qymbat, altyn basty qorlap tutqynǵa aldy. Adam degen atymdy joǵaltty»,- degen lırıkalyq keıipker sózi – zulmat zaman shyndyǵy, Alash bozdaqtarynyń óksigi, qasıetti taǵdyrlar qasireti edi.
«Bul kúnde et, denem aýyrsa da, shirise de, ot rýhym saý, bútin. Baqytty keleshekten úmit jibin kespeımin. Sol qanatty úmit arqasynda ólmeı tiri jatyrmyn. Erte, kesh pe bostandyq dúnıesine shyǵatynyma senemin. Ótken dáýren oralyp, kóshken baqtyń qaıyrylý oıyna senemin. Keń saraı, aq orda, bostandyq, jumaq tórinen oryn alýǵa senemin»,- dep aıaqtady sózin Gúlsezim. Bir ǵasyr buryn jazylǵan áýlıe sózdiń shyndyǵyna kózimiz jetip otyr qazir. Keń saraıly, aq ordaly Astana tórinde qazaq balasy erkin tynystaıdy. «Halyq jaýynyń» sózi dep tyıym salynǵan kórkem shyǵarma táýelsiz Qazaq eliniń azamatyn tebirentti. Q.Qýanyshbaev atyndaǵy qasıetti shańyraqqa jınalǵan kórermenniń qol soǵýy uzaqqa sozyldy. Kózine jas úıirilgen jastar da boldy. Biz de ishten tynyp, shattyq pen shúkirlik aralasqan sezimdi jasyra almaı turdyq.

Halyq aqyny Qonysbaı Ábil tóraǵalyq etken baıqaýda Alash dáýirinen bir ǵana shyǵarma oqyldy. Erkindik ańsaǵan otty sóz táýelsiz Qazaq eli azamatynyń júregine uıalady. Alash sózi úkilep báıgege qosqan shákirtimizdi júldege jetkizdi. Alash arýaǵy jas qyzdy jebedi.
Qaıyrbek KEMEŃGER,
L.N.Gýmılev atyndaǵy EUÝ
qazaq ádebıeti kafedrasynyń dosenti