Shyǵys Qazaqstan oblysynyń ákimi Danıal Ahmetov Semeı qalasynyń qoǵamdyq kólikteriniń jumysyn erekshe jolmen tekserdi: № 13 baǵytynda júretin avtobýsqa otyryp, birneshe aıaldama júrip ótti, - dep habarlaıdy kaz.tengrinews.kz.
Basylym málimetinshe, "Temir jol vokzaly" aıaldamasynda Ahmetov avtobýstardy qarap shyqty. Birinshi toqtaǵan № 29 baǵytynda júretin avtobýs jolaýshylardy tasymaldaý jumysynyń bar qyzyǵyn kórsetti. Qytaılyq avtobýstyń bamperleri búlingen, al júrgizýshisi tazalyq pen uqyptylyǵymen maqtana almady.
Danıal Ahmetov № 13 baǵytynda júretin avtobýsqa otyryp, barlyq jolaýshylarmen birge birneshe aıaldama júrip ótti. Oblys ákimi qoǵamdyq kóliktegi olqylyqtardy aıtyp, tapsyrmalar berdi. Jumys sapary barysynda óziniń baıqaǵandaryn ol qalalyq máslıhattyń depýtattarymen bólisti.

"Depýtattardyń qaısysy árdaıym qoǵamdyq kólikpen júredi? Sol úshinde depýtattardy qoǵamdyq kólik máselesi asa qyzyqtyrmaıdy. Men búgin avtobýspen júrip qaıttym. Meniń ne kórgenimdi bilesizder me? Birinshiden, avtobýstardyń ýaqyty belgilenbegen, aıaldamalarda olar belgilenbeıdi, tek sońǵy aıaldamada esep beredi. Avtobýstyń salony óte las, áınekterin japqyshtar emes, kir jaýyp tur. Sonymen qatar, tútin shyǵatyn qubyr jolaýshylar otyratyn jaqtan shyǵyp tur!", - dep shúılikti Ahmetov. Shyǵys óńiriniń basshysy halyq qalaýlylarynan osy máseleni jaqyn arada sheshýdi tapsyrdy. "Sizder tarıfti ósirýdi suraısyzdar. Múmkin ony da istermiz, biraq ol úshin qyzmet kórsetý sapasyn joǵarylatý qajet. Ázirge baǵany ósirýge men sebep kórip turǵanym joq", - dedi SHQO ákimi.