Atyraý qalasyndaǵy balalar kólik astyna ádeıi júgirýdi ádetke aınaldyra bastady dep habarlaıdy Qamshy aqparattyq agenttigi mgorod.kz-ke silteme jasaı otyryp. Balalar joldyń boıynda jınalyp kólik kele jatsa júgiredi eken.Oıynnyń maqsaty – zýlap kele jatqan kóliktiń aldynan júgirip ótý. Oıyn «Júgir nemese ól» dep atalady.
Osy oıynǵa baılanysty oqıǵa 21-sáýir kúni saǵat 14:00-de Vladımırskıı kóshesinde bolǵan.
«Grın Bear aıyrbastaý beketi mańyndaǵy baǵdarshamda 13-14 jastaǵy balalar toby turdy. Men olardyń qasyna jaqyndaı bergende balalardyń biri meniń kóligimniń aldyna qaraı umtyldy. Men tejegishti basyp úlgerdim, al bala bolsa yrjalańdap júgirip ketti. Al ózgeleri oǵan «jaraısyń» degendeı qoshemet bildirip jatty. Qýyp jetkim kelgen, biraq bolǵan oqıǵadan keıin eseńgirep qaldym»,- dep oqıǵany kólik júrgizýshisi baıandap berdi. Kýágerlerdiń aıtýlary boıynsha, taǵy 10 jastaǵy bala kólikke qaraı umtylǵan. Abyroı bolǵanda kólik jáı jyldamdyqpen kele jatqandyqtan, toqtap úlgergen.
«Bul oıyn «Sınıı kıt» oıynyna uqsas jastardyń jańa kóńil kóterý úshin shyǵarǵan ádisi sıaqty. Jas balalardyń qasynan ótkende abaı bolyńyzdar», – deıdi kólik júrgizýshileri.