Búgin Aqordada QR Prezıdenti Ákimshiliginiń Basshysy Ádilbek Jaqsybekovtiń tóraǵalyǵymen Qazaqstan Respýblıkasy Prezıdentiniń janyndaǵy Qoǵamdyq sanany jańǵyrtý baǵdarlamasyn iske asyrý jónindegi ulttyq komısıanyń birinshi otyrysy bolyp ótti.
Otyrys barysynda Ulttyq komısıanyń maqsattary men mindetteri, Memleket basshysynyń «Bolashaqqa baǵdar: rýhanı jańǵyrý» atty maqalasynda usynylǵan baǵyttardy iske asyrý joldary talqylandy.
Qoǵamdyq sanany jańǵyrtý baǵdarlamasy sheńberinde jobalardy iske asyrý úshin jumys toptary qurylatyn bolady. Olardyń quramyna salalyq mamandar, sarapshylar, sondaı-aq kópshilik qaýym ókilderi, sonyń ishinde tanymal ǵylym, bilim jáne mádenıet qaıratkerleri kiredi.
Árbir jumys toby bir aılyq merzimde qajetti resýrstyq qamtamasyz etýdi eskere otyryp ózderiniń is-qımyl algorıtmin usynady.
Buǵan qosa, Qoǵamdyq sanany jańǵyrtý baǵdarlamasyn iske asyrý jónindegi is-sharalar jospary men komısıa jumysyn reglamentteıtin Ulttyq komısıa týraly ereje qaraldy.
Ulttyq komısıa Prezıdent Jarlyǵymen qoǵamdyq sanany jańǵyrtý baǵdarlamasyn iske asyrý, eldiń odan ári ilgerilemeli mádenı-gýmanıtarlyq damýyn qamtamasyz etý maqsatynda qurylǵan bolatyn.
Komısıanyń quramyna tanymal qoǵam qaıratkerleri, ǵalymdar, jazýshylar, jýrnalıser, Parlament depýtattary, Prezıdent Ákimshiliginiń ókilderi, Úkimet músheleri, óńirler, Astana jáne Almaty qalalarynyń ákimderi, Qazaqstan halqy Assambleıasynyń músheleri, saıası partıalardyń músheleri engen.