Qamshy aqparattyq agenttiginiń hat qorjynyna Qaldyqyz Beshimbaeva esimdi oqyrmannan hat keldi. Onda Dımash Astanaǵa kelgennen keıin, halyqpen júzdesý úshin uıymdastyrylyp otyrǵan jıynǵa barǵanyn jáne ondaǵy kórgenin jazyp otyr. Vıdeo Qaldyqyz Beshimbaevaniki. 

BOLYS BOLDYM, MİNEKI

...Kúshtilerim sóz aıtsa, 
Bas ızeımin shybyndap.
Álsizdiń sózin salǵyrtsyp, 
Shala uǵamyn qyryndap.

Uly Abaıdyń aıtqan «bolysyn» Dımashtyń konsertinen kórdim. BAQ betterinde Dımashty marapattaýǵa arnalǵan keshtiń ótetindigi jáne kirý tegin bolatyny týraly jarıalandy. Dımash elge qashan oralady dep taǵatsyzdana kútip otyrǵan halyq keshtiń bastalýynan eki saǵat buryn kele bastady. Solardyń biri - qasyma jetpiske taıaý qart anam ertip, elpildep jetken men edim. Erte barǵandaǵy maqsatymyz - qarıanyń qan qysymy joǵary bolǵan soń, tómengi oryndarǵa jaıǵasý edi. Alaıda is basqasha boldy...
Parterge bardyq – oryn joq, beletajǵa bardyq – oryn joq, balkonǵa bardyq – oryn joq, galereıada ǵana oryn qalypty. Esikti ashyp, kirgizgeni jańa ǵana edi, qalaı oryn joq? El ań-tań... Bulaı bolmas degen úmitpen parterge qaıta keldik.
Qoldarynda shaqyrý bıletteri bar «jaısańdar» kirip jatyr eken. Bıletsiz «músápirler» bir shette tur edik, kenetten ashýǵa býlyqqan bireýi artymyzdan ekpindetip ıtere jónelgeni. Sol ekpinmen ishke endik. Apyr-topyrdan shoshynǵan kúzetshi jigitter ata-ájelerge aıaqtaryn tóseı qalǵany. Qarttar shalynyp, qulaı jazdap ótip jatyr. Óte bergenimiz sol edi, kózi alarǵan jas qyz «sizderge munda kirýge bolmaıdy» dep baıbalam saldy. Meniń anam: «men sıaqty qarıa kirmegende, kim kiredi?» dep óktem sóılep qalyp edi, qyz da tynyshtala qaldy. Orynǵa baryp jaıǵasqan soń da tynym bermedi. Ekinshi qyz keldi, ol ketti. Orta jastaǵy er adam kelip: 
- Sizder bul oryndy bosatýlaryńyz kerek, - dedi.
- Nege?
- Bos emes. 
- Nege bos emes?
- Shaqyrý bıleti barlar otyrady.
- Shaqyrý bıleti ne úshin berildi?
- Bosatyńyzdar. 
- Turmaımyz, tegin dep habarlanǵan. Tegin keshke shaqyrý bıleti ne úshin berildi?
- Men áli kelemin. 
- Ne úshin kelesiz? Siz kimsiz?
- Osy jerdiń bastyǵymyn. 
- Sizder osyndaı sheneýniktik jymysqy áreketterińizdi qashan qoıasyzdar?
- Dımash sizderdiki ǵana ma? Ol - halyqtiki.
Ún-túnsiz ketip qaldy. Uıaldy ma? Áı, qaıdam? Bolǵan shyǵar dep edik, beker eken. Tórtinshisi keldi (beınerolıkte). 
«Jaısańdardyń» arqasynda aman qaldyq. Sol jaǵymyzda mınıstrliktiń, oń jaǵymyzda apparattyń «naǵyz adamdary» otyr eken. «Mınıstrlikten» degen sózdi estigende, «keshirińiz» dedi de, jalt berip, joq boldy. 
«Abaı joly» romanyndaǵy án tyńdaımyn dep Maıbasardan taıaq jegen kedeı jigit pen «Aıǵyz ben Qalıqanyń kárine qaramaı...» ánshilerge ketken Iis kempir biz boldyq. 

Keshterde, konsertterde arnaı shaqyrylǵan qonaqtar bolatyny burynnan belgili... Biraq olar soǵys ardagerleri, óner men mádenıetke eńbegi sińgen qaıratkerler, qoǵam qaıratkerleri, elimizge eńbegi sińgen qurmetti azamattar, sonymen qosa, Dımashtyń syıly qonaqtary bolsa, túsinerlik jaǵdaı. Átteń, biraq basqasha...
Bizdiń janymyzdaǵy jáne parterge jaıǵasqan «jaısańdar» sheneýnikterdiń atasynan bastap shóberesine deıingi taıly tuıaǵy. Olardyń ájesi sıaqty meniń ájem de otyr. Ájeden ájeniń qandaı aıyrmashylyǵy bar? Bir qyzyǵy, olar Dımashtyń konsertine onyń ónerin súıetin kórermen emes, «MINISTR» bolyp keledi eken. Zaldy toltyrý úshin shaqyrý bıletin berýge de bolatyn shyǵar, biraq oryn kórsetilmesin. Arnaıy shaqyrylǵan kórermen men Dımashty bir tyńdap, júzin bir kórýge yntyǵyp kelgen kórermenniń qandaı ereksheligi bar?

 Qaldyqyz Beshimbaeva