Búgin QR Úkimeti otyrysynda QR Premer-Mınıstri Baqytjan Saǵyntaev 2017-2020 jyldarǵa arnalǵan Qazaqstan Respýblıkasynyń din salasyndaǵy memlekettik saıasaty tujyrymdamasynyń jobasyn qaraý barysynda rýhanı-adamgershilik tárbıe men qoǵamda halyq arasynda radıkaldyq dinı ıdeıalardy taratýǵa jol bermeý jónindegi jumystardy jandandyrýdy tapsyrdy. 

Memleket basshysy Qazaqstan musylmandary dinı basqarmasynyń ókilderimen jaqynda ótken kezdesýde jas býynnyń dinı bilimsizdigine erekshe nazar aýdardy, dep atap ótti Baqytjan Saǵyntaev.  

QR Premer-Mınıstri Qazaqstannyń polıkonfessıalyq memleket ekenin jáne elimizde din salasynyń máselelerine basa nazar aýdarylatynyn aıtty. 2017-2020 jyldarǵa arnalǵan din salasyndaǵy memlekettik saıasat tujyrymdamasy qoǵamdyq sananyń jáne jalpy qoǵamnyń turaqty ári úılesimdi damýyn qamtamasyz etýi tıis.

Osyǵan oraı QR Din isteri jáne azamattyq qoǵam mınıstrligine óńirlermen birlesip, rýhanı-adamgershilik tárbıe men qoǵamda radıkaldyq dinı ıdeıalardy taratýǵa jol bermeý jónindegi jumystardy jandandyrý qajet. Budan ózge, atalǵan salada durys tárbıelik ári aǵartýshylyq jumystardy birlesip atqaryp, konfesıalar arasyndaǵy kelisimdi nyǵaıtýǵa kúsh salý kerek.

QR Premer-Mınıstri «Qudaıdy óz júrekterińizden izdeńizder, ony basqa esh jerden tappaısyzdar» degen danalyq sózdi eske túsirip ótti. Sol sebepti de, atalǵan jumysty júrgize otyryp, qoǵamnyń basty mindeti árkimniń júregine osy túsinikti jetkizý bolyp tabylady.