Reseı prezıdenti Vladımır Pýtın balalardyń esimin sıfrlar, tynys belgiler, sondaı-aq ataq, dáreje, tıtýl syndy dúnıelermen baılanystyryp qoıýǵa tyıym salatyn zańǵa qol qoıdy, dep habarlaıdy Qamshy aqparattyq agenttigi life.ru basylymyna silteme jasap.

Jańa qujatqa sáıkes balanyń tegi ata-anasynyń tegimen jazylatyn bolady. Qujatta balany ne ákesiniń, ne anasynyń, ne bolmasa eki jaqty tekti defıs arqyly jazýǵa ruqsat etilgeni kórsetilgen.

Balaǵa jónsiz esim qoıa bermeýdi senator Valentına Petrenko usynǵan. Keıinirek zańdy Memlekettik dýma ókilderi qabyldap, Federasıa Keńesiniń músheleri bekitti. Máskeýde jas analar resmı túrde balalarynyń esimin kóbine bylaı tirkegen: Nıkolaı-Nıkıta-Nıl, Hrıstamrırados, Delfın, Iaroslav-Lútobor, Lýka-Schaste, Sammerset Oýshen, Aprel, Polına-Polına, Prınsessa-Danıella, Zará-Zaránısa, Alesha-Kaprına, Sofıa-Solnyshko. Osy syndy esimderdiń baryn bilgen bılik ókilderi iske kóshýdi jón kóripti.

Elimizde dál osyndaı keleńsizdikterdiń oryn alyp keletini jaıynda aıta ketken jón. Keı ata-ana balam ataqty bolsyn, sol adamǵa uqsasyn degen nıetpen tanymal tulǵalardyń esimin tegimen qosa qoıyp jatady. Máselen, Shámshi Qaldaıaq, Nursultan Nazarbaı, Madına Eráli t.b. Sondaı-aq, elimizde tarıhı jaǵdaı oryn alsa, sol kúnderdiń esteligi deıdi me eken, álde bolyp jatqan oqıǵa áser etti me, áıteýir Azıada, Olımpıada, Samıt, Ýnıversıada, Daǵdarys, Astana dep esim qoıý da jıilep barady qoǵamda. Derekterge súıensek, esim qoıý – balanyń bolashaqtaǵy taǵdyryna áser etedi. Tipti, búgingi tańda mán-maǵynasy joq, balaǵa jón-josyqsyz esim qoıatyn ata-analar qatary kóbeıgen. Adamnyń esimi sol ulttyń qundylyǵyn kórsetip turýy kerek. Muny túsingen ata-ana balanyń esimimen, eń áýeli taǵdyrymen oınamaıdy.

 Reseı bıligi osy jaıttardy túsinip, retteýge kóshken. Qazaqstan bıligi de qarapaıym dúnıe bolyp kóringenimen, qoǵam máselesine aınalǵan osy jaıtty qarastyryp, bir retin keltirer degen úmittemiz.