Almaty qalasynyń ákimi Baýyrjan Baıbektiń qyzmeti ósip Astanaǵa qaıtýy múmkin dep jazady Qamshy aqparattyq agenttigi.
Beıresmı Derekkózderdiń málimdeýinshe erteń Astanada birqatar kadrlyq ózgerister men taǵaıyndaýlar oryn alýy múmkin. Onyń ishinde Almaty ákimi Baýyrjan Baıbektiń Astanaǵa qaıtý yqtımaly basym. Ákimniń qyzmeti Aqordadan biraq shyǵýy múmkin deıdi biletinder. Sarapshylar ony Prezıdent ákimshiligine laıyq kóredi. Olaı deıtin negiz de bar, óıtkeni Baýyrjan Baıbek prezıdent ákimshiliginde buǵan deıin de attaı 8 jyl qyzmet atqarǵan. Onyń keıingi tórt jylyn Prezıdent ákimshiligi jetekshisiniń orynbasary retinde ótkerdi. Ol erte jasynan prezıdent senimine bólenip, aınalasynan tabylǵan sanaýly jastardyń biri.
Buǵan deıin de Baýyrjan Baıbek Astanaǵa aýysqaly jatyr dep birneshe sybys shyqqan. Alaıda, tórt birdeı oblystyń ákimin aýystyrǵan Elbasy aldyńǵy joly Baýyrjan Qydyrǵalıulyn Astanaǵa áketken joq. Osy joly onyń Astanaǵa qaıtýyna da sebepter bar. Baýyrjan Baıbek áý basta Almatyda XXVIII qysqy ýnıversıada oıyndaryn sátti ótkizý mısıasymen ákim bolyp taǵaıyndalǵan bolýy múmkin. Almaty «aq olımpıadany» shyp-shyrǵasyn shyǵarmaı-aq ótkerdi. Almatynyń myń jyldyǵyn da Baýyrjan Baıbek dúbirletip toılap berdi. Onyń kezinde Esimovtiń kezindegideı qar qalyń tússe de kúrelmeı qalǵan joq. Alla saqtap sý tasqyny sıaqty úlken apat ta bolmady. Qalanyń halqy ósti, ekonomıkasy artty. Birsypyra jol jasaldy. Jalpy, Baýyrjan Baıbek ákim qyzmetinde abyroımen kórine bildi.
Ol Astanaǵa kimniń ornyna ketedi? Almatyǵa kim keledi? Bul suraqtarǵa jaýap kóp. Prezıdent Ákimshiligin eki márte basqarǵan Ádilbek Jaqsybekov zańǵa saı shilde aıynda zeınetke shyǵady. Osy qarsańda Elbasy Jaqsybekovti áldeqaıda tynyshyraq «Samuryq-Qazyna» UÁQ-ń basqarma tóraǵasy qyzmetine aparýy múmkin. Ol qazynadan habarsyz adam emes. Memlekettik qyzmetke keler aldynda uzaq jyl korporasıa basqarǵan. Al, Ádilbek Yryskeldiulynan 10 jasqa jas Ómirzaq Shókeev Almatyǵa ákim bolyp kelýi bek múmkin. Buǵan deıin de turǵyny eń kóp oblysty basqarǵan tájirıbesi bar Shókeev kelip alyp Almatyny, iri megapolısti basqarady degen sybys shyqqan. Bulaı bolǵan jaǵdaıda Marat Tájın Baýyrjan Baıbekke orynbasar bola ma? Kerisinshe bola ma? Anyǵyn prezıdent biledi. Bizdiki órekpigen kóńil ǵana.
Nurǵalı Nurtaı
