Astanadaǵy Ulttyq mýzeıde 4 mamyrda Jeńistiń 72 jyldyǵyna arnalǵan kórme ashyldy, dep jazady Qamshy aqparattyq agenttigi.
Habar arnasy tilshileriniń habarlaýynsha, onda Uly Otan soǵysy ardagerleriniń fotosýretteri, jeke zattary men tarıhı jádigerler qoıylǵan. Qandy shaıqasty beıneleıtin dıoramalardy da kezdestirýge bolady. Kórme eki apta boıy ótedi. Maqsat – jastardy otansúıgishtikke baýlyp, eli úshin janyn pıda etken batyrlardyń esimin jańǵyrtý.
«Eshkim de, eshqashan da umytylmaıdy!» Uly jeńisti syılaǵan jaýyngerler erligi máńgilik el esinde. Óskeleń urpaq ta olardy qurmetteýge ári úlgi tutýǵa mindetti. Búgingi Ulttyq mýzeıde uıymdastyrylǵan Jeńistiń 72 jyldyǵyna arnalǵan kórme qaharmandarymyzdyń erligin dáripteıdi.
"Barlyq qujattar muraǵattan alynǵan. Kórmege soǵys ardagerleriniń sýretteri, medaldary jáne jeke zattary qoıyldy. Tipti jaýyngerlerdiń hattary bar", - deıdi QR Ulttyq mýzeıi ekspozısıa jáne kórme qyzmetiniń jetekshisi Toǵjan Ádilbekova.
Óz jerin jaýǵa taptatpaı, shybyn jandaryn shúberekke túıip, qasyq qany qalǵansha shaıqasqan batyrlarymyzdyń erlikterin baıandaıtyn kitaptar da kórmege qoıylǵan. Sum soǵysqa tótep bergen jýyngerlerdiń qarý-jaraqtary men jeke zattary búginde murajaıdyń basty jádigerlerine aınalǵan.
Mánshúk Mámetova Maksım pýlemetimen talaı jaýdyń kózin joıǵandyǵy belgili. Árıne, bul pýlemettiń restavrasıa jasalǵan túri. Kórmege 150-den astam eksponat qoıylǵan. Olardyń barlyǵy 1941-45 jyldar aralyǵyndaǵy Uly Otan soǵysynan syr shertedi.
QR Ulttyq mýzeıiniń qyzmetkeri Serik Ábdirahmanov tarıhı fotolarǵa qarap, ornalasqan jerdiń rekonstrýksıasyn jasaǵan. Onyń aıtýynsha, ár jasalǵan dúnıe estetıka jaǵynan balalardyń motorıkasyn damytady, ári kórermender ótken shaıqastardyń tehnıkasy qalaı bolǵanyn kóredi.
Biz sum soǵysty kórgen joqpyz. Ol úshin 72 jyl buryn jeńis syılaǵan qaharmandarymyzǵa qaryzdarmyz. Qanshama jaýynger urys dalasynan qaıtpaı qaldy, qapyda qolǵa túskenderi nemis tutqynynda azap shekti. Eli úshin janyn pıda etti.
