Jaıyq ózeniniń tasyp, sýdyń kóterilýine baılanysty jeti han jerlengen Saraıshyqty sýdan qorǵaý jumysy ýaqytsha toqtatyldy dep habarlaıdy Qamshy aqparattyq agenttigi Atyraý oblysy baspasóz qyzmetine silteme jasaı otyryp.

Jaǵany bekitýmen aınalysyp jatqan bas merdiger “AIS-Astana” kompanıasynyń ókili Asqar Tólenovtyń aıtýynsha, jumystyń ýaqytsha toqtaıtyny áýel basta belgili bolǵan, sondyqtan bul kidiris 2018 jyly aıaqtalýy kerek jobanyń uzaqtyǵyna áser etpeıdi. Ol jumystyń úsh kún buryn toqtaǵanyn aıtty.

Sý resýrstaryn paıdalanýdy retteý jáne qorǵaý jónindegi Jaıyq-Kaspıı baseındik ınspeksıasynyń basshysy Ǵalıdolla Ázıdýllınniń aıtýynsha, búgin Jaıyqtaǵy sý deńgeıi 365 santımetrge deıin kóterilip, 672 santımetrdi alqymdaǵan. Al aımaqtaǵy qaýipti deńgeı – 850 santımetr. Ǵalıdolla Ázıdýllın sýdyń bul qaýipti kórsetkishke jetpeıtinin boljap, tilsiz jaýdyń maýsym aıynyń basynda qaıta bastaýy múmkin ekenin aıtty.

Al, bas merdiger kompanıa ókili barlyq qaýipsizdik sharalarynyń jasalǵanyn aıtty.

“Jumysty toqtatpas buryn jaǵaǵa topyraq salynǵan qapshyqtardy tizip qoıdyq. Buny aǵys-tolqynnyń jarǵa soǵýyn barynsha báseńsitý úshin jasadyq”, – deıdi ol. Ókildiń aıtýynsha, sý qaıtqan soń mamandar birden iske kirisedi.

Asqar Tólenov tıisti 6000 sharshy metr betonnyń úshten biriniń quıylyp úlgergendigi jetkizdi.

Aıta ketelik, byltyr Atyraý oblysynyń ákimdigi 1,5 mıllıard teńge qarastyryp, kóne shahardy shaıyp bara jatqan Jaıyq ózeniniń jaǵasyn bekitýdi bastady.  Odan keıin Mádenıet jáne sport mınıstrligi ejelgi qalany qalpyna keltirý úshin taǵy 100 mıllıon teńge bóletinin málimdedi. Saraıshyq qalasyn týrısik ortalyqqa aınaldyrý úshin kásipkerlerdi tartý josparlanyp otyr.

Kóne shahar Atyraý qalasynan 45 shaqyrym jerde Jaıyq ózeniniń jaǵasynda ornalasqan. Altyn orda handyǵynyń saıası, ekonomıkalyq ortalyqtarynyń biri bolǵan qala Qasym hannyń tusynda Qazaq handyǵynyń astanasy atandy. Jibek jolynyń boıynda turǵan munda 7 han jerlengen. Olar: Móńke, Toqtaǵý, Jánibek, Ámir Oqas, Qasym han, Shıh Mamaı jáne Júsip handar.