Astana ákimi Áset Isekeshev qurylys kompanıalarynyń abattandyrý erejelerin buzǵany úshin qatań synǵa alǵan soń qurylys alańdaryn tártipke keltirýge kiristi, dep habarlaıdy Qamshy aqparattyq agenttigi qala ákimdiginiń baspasóz qyzmetine silteme jasap.
Eske salsaq, 24 sáýirde elorda ákimdiginde keńeıtilgen otyrys ótip, onyń barysynda qala basshysy «QR sáýlet, qala qurylysy jáne qurylys qyzmeti týraly» QR Zańyn buzǵany úshin qurylys kompanıalarynyń basshylarynan túsinikteme berýdi talap etti.
«Qurylys kompanıalary zań talaptaryn durys oryndamaı otyr, sanıtarlyq kútip-ustaý erejelerine jaýap bermeıdi. Qurylys alańdarynda kólik dóńgelekterin jýatyn oryn joq, qoqys shyǵarylmaıdy, jáne úılerdiń sapasy da kúdik týdyrady. Bizge qurylys mádenıetin jańa sapalyq deńgeıge kóterý qajet», - degen bolatyn ákim.
Osydan keıin ákim sózden iske kóship, elordadaǵy barlyq qurylys kompanıalaryn tekserýge kiristi.
Búgingi kúni elorda aýmaǵynda jeke turǵyn úılerdiń qurylysy men páterlerdi qaıta josparlaýdy esepke almaǵanda, 560 kompanıa 1020 nysannyń qurylysy júrgizilýde.
2017 jyldyń birinshi toqsanynda qoldanystaǵy zańnamany buzǵany úshin 17 kompanıada jumystar toqtatyldy.
Sondaı-aq, abattandyrý erejelerin buzǵany úshin ruqsat berilmegen kompanıalar da bar.
Atalǵan kezeńde 27 kompanıa 2 425 030 teńge somasyna ákimshilik jaýapkershilikke tartyldy. Al reıd sharalary sheńberinde Astana qalasy İİD jergilikti polısıa qyzmetiniń tabıǵat qorǵaý polısıasynyń mamandary abattandyrý jáne sanıtarlyq kútip-ustaý erejelerin buzǵany úshin birneshe kompanıada jumystardy toqtatqan.
Sonymen birge, jer qatynastary basqarmasy jer ıgerý merzimderin buzǵany úshin 58 kompanıanyń jer telimin jalǵa berýdi uzartý týraly ótinishin keri qaıtardy.
Ákim osy baǵyttaǵy jumystardy odan ary jalǵastyryp, qaladaǵy barlyq qurylys alańdarynyń sanıtarlyq jaǵdaıyn baqylaýda ustamaq. Qala basshysy zań buzǵan qurylys kompanıalaryna qatysty qurylys júrgizýge beriletin ruqsatty keri qaıtaryp alýǵa deıin qatań sharalar qabyldanatynyn aıtyp eskertti.
