Almatyda Jeńis kúni qala turǵyndary men qonaqtary Dańq memorıalyna gúl shoqtaryn qoıý jáne Ekinshi dúnıejúzilik soǵysta qurban bolǵandardy eske alý úshin 28-shi gvardıashyl-panfılovshylar saıabaǵyna keldi, dep habarlaıdy Qamshy aqparattyq agenttigi qala ákimdiginiń baspasóz qyzmetine silteme jasap.
Máńgilik alaýǵa gúl shoqtaryn qoıý rásimi barysynda Almaty ákimi Baýyrjan Baıbek orasan admdardyń qurbandyǵy arqasynda Uly Jeńiske qol jetkenin atap ótti. Turǵyndary 6 mıllıonnan asatyn Qazaqstan qan maıdanǵa óz azamattarynyń 20%-yn attandyrdy, solardyń árbir ekinshisi surapyl soǵysta qaza tapty.
«Soǵystyń barlyq maıdandarynda qazaqstandyqtar jaýmen aıanbaı shaıqasty. Baýyrjan Momyshulynyń, Talǵat Bıgeldınovtyń, Álıa Moldaǵulovanyń, Mánshúk Mametovanyń, Sergeı Lýganskııdiń, Leonıd Bedanyń, Núrken Ábdirovtyń jáne myńdaǵan basqa da qazaqtandyqtardyń esimi uly erlikter tarıhyna altyn áriptermen jazyldy. Bizdiń basty boryshymyz – Táýelsiz Qazaqstanda beıbitshilik pen kelisimdi saqtaı otyryp, óskeleń urpaqtyń ashyq aspan astynda ómir súrýin qamtamasyz etý», - dedi Almaty ákimi.
Ol óziniń sózinde tylda da qazaqstandyqtardyń janqıarlyq erlik kórsetkenin, áıelderdiń, qarttardyń, balalardyń jeńis úshin aıanbaı eńbek etkenin aıtty. Soǵys jyldary barlyq óndiris oryndary qan maıdanǵa qajet zattar shyǵarýmen boldy. On oqtyń toǵyzy qazaqstandyq qorǵasynnan quıyldy.Respýblıkada jalpyodaqtyq mystyń 35%-y, qorǵasynnyń 83%-y, molıbdenniń 60% -y shyǵaryldy.
Baýyrjan Baıbek óziniń sózinde maıdanǵa attanǵan 1 mln. 200 myń qazaqstandyqtyń 160 myńnan astamy almatylyq ekendigin aıtty. Ol jastardyń erlikteri ǵasyrlarǵa jalǵasqan ardagerlerdi únemi qurmet tutýy tıis ekendigin sóz etti. Qazaqstan men bizdiń týǵan ólkemizdiń qan maıdandaǵy Jeńiske qosqan úlesi jastardyń jadynda bolýy tıis.
«Elbasynyń syndarly saıasaty arqasynda bizdiń elimiz birlik pen turaqtylyqty, kelisimdi tý etip, beıbit aspan astynda ómir súrýde. Dini men tili, ulty bólek árbir qazaqstandyq erteńgi bolashaǵyna úlken senimmen qaraýda, tamyrlaryn tereńge jaıyp, urpaq ósirýde. Memleket basshysy aıtyp ótkendeı, Qazaqstan týraly sóz bola qalsa, bizdiń qazaqstandyqtarǵa qurmet kórsetiledi. Óıtkeni, bizdiń uranymyz- beıbitshilik. Jastar soǵys ardagerleriniń, batyr qazaqstandyqtardyń, solardyń ishinde almatylyqtardyń máńgilik erlikterin únemi este saqtaýlary tıis. Bul bizdiń tarıhymyzdyń bir bóligi.Patrıotızm rýhy bárimizdi biriktirip, uly Ultymyzdy myqty etedi», -dep atap ótti B.Baıbek.
Saltanatty shara barysynda jınalǵandar qurban bolǵandardy bir mınýt únsizdikpen eske aldy, artynan qurmetti qaraýyldyń sherýi ótip, merekelik konsert boldy. Roza Rymbaeva, Taǵat Kúzembaev, «ILCanto» kvarteti, «Art-klassık toby, Bereke Eńkebaeva, Alekseı Tımofeev jáne basqalary «Poklonımsá velıkım tem godam», «Sváshennaıa voına», «Jas qazaq», «Álıa», «Talánochka», «Saǵadat», «Smýglánka» syndy kompozısıalardy oryndady.
Saltanatty mıtıńten soń qala kóshelerinde «Qaharman ult» sherýi bastaldy. UOS-na qatysýshylardyń sýretterinen ózge, áskerıqyzmetshiler jınaǵan 164 fotosýrettiń ishinen UOS batyrlarynyń 10 fotomozaıgi sherýge qatysýshylar qolynda boldy.
Astana alańynda saǵat 20:00 den 22:00-ge deıin «Taǵzym!» atty konsert bolyp, onda «Saǵadat», «Temnaıa noch», «Na bezymánnoı vysote», «Kesteli oramal», «Soǵystan qaıtqan soldattar» jáne basqada áskerı ánder oryndalady. Saltanatty shara otshashýmen aıaqtalady.
Atap óterlik jaıt, Jeńis kúnine oraı qalada túrli aksıalar ótýde. Mysaly, mektep oqýshylary «Eskertkish vahtasy» aıasynda Uly Otan soǵysyna qatysýshylardyń eskertkishteri janynda qurmetti qaraýylda turýda. Barlyq mektepterde «Erlik sabaqtary» ótti. 28 gvardıashyl-panfılovshylar jáne Tuńǵysh Prezıdent saıabaqtarynda, Arbatta túri sharalar uıymdastyryldy. Oǵan Á.Qasteev atyndaǵy qoldanbaly óner jáne tehnıkalyq dızaın mektebiniń 302 oqýshy- sýretshisi qatysty.Jubanov atyndaǵy mýzyka mektebi men Chaıkovskıı atyndaǵy koledj oqýshylary da óz úlesterin qosty. Al, Ǵ.Músirepov atyndaǵy jastar teatrynyń artıseri Baýyrjan Momyshulynyń, Álıa Moldaǵulovanyń, Mánshúk Mametovanyń, Ivan Panfılovtyń, Talǵat Bıgeldınovtiń, Rahymjan Qoshqarbaevtyń, Málik Ǵabdýllınniń, Sergeı Lýganskııdiń tiri beınelerin somdady. Dańq Memorıaly aldyndaǵy alańda alǵys qabyrǵalary men «Biz - batyrlardyń urpaǵy», «#Biz_jeńis urpaǵymyz!» atty qondyrǵylar ornatyldy.
Daıyndaǵan: Gúlim Jaqan
