Petropavl  qalasynda 29 sáýir  kúni polısıa qyzmetkeriniń avtokóligi velosıpedtegi balany qaǵyp ketken. Bolǵan oqıǵanyń  vıdeosy Instagram jelisinde 9 mamyr kúni skopetro akkaýntynda júktelgen bolatyn, dep habarlaıdy Qamshy aqparattyq agenttigi.

Vıdeodan polısıa qyzmetkerleriniń avtokóligi ońǵa burylǵany anyq kórinedi. Dál sol ýaqytta velosıped tepken bala  baǵdarshamǵa qaraı baǵyt alǵan. Avtokólik balany qaǵyp, velosıpedti basyp ótedi. Sol sátte jaıaý júrginshi jáne polısıa qyzmetkeri kómekke keledi.

Oqıǵa Mıra men Sútishev kóshesiniń qıylysynda 29 sáýir kúni oryn alǵan.  Kólik qaqqan balanyń 9 jasta ekeni málim bolyp otyr.

Instagram jelisinde júktelgen vıdeoǵa pikir qaldyrýshylardyń sanynda shek joq. Sonyń biri belousko_yuliya. Jeli qoldanýshysynyń jazǵan pikiri boıynsha, polısıa qyzmetkerleri jazadan qutylýdy oılap otyr. Bala túrli jaraqattarmen aýrýhanaǵa jetkizilgen. Omyrtqasy men búıregine zaqym kelgen. Oqıǵanyń kýási bolǵandarǵa nómirin qaldyryp, habarlasýdy ótingen. Biz kináli adamdar jazalanbaı qalady  dep qorqýdamyz. Bala áli kúnge deıin aýrýhanada. Aqyly bólimde emdelýde. Al polısıa qyzmetkerleri balanyń jaǵdaıyn bilýge kelmedi deıdi jeli qoldanýshysy.

Olgaserash akkaýntynan kelgen pikir boıynsha, bala jolǵa baǵdarshamnyń nusqaýynsyz shyqqan. Baıqaýsyzda dóńgelek astyna túsip otyr. Oqys jaǵdaıǵa árıne balany da polısıa qyzmetkerin de kinálaýǵa bolmaıdy deıdi.

Jol-kólik oqıǵasy biryńǵaı sotqa deıingi tergeý tizimine 1 bólim  345 bap boıynsha engizildi. Kólik júrgizýshisi oqıǵa oryn alǵan sátte mas  bolmaǵan, dep málimdedi SQO İİM baspasóz qyzmetine.

Sholýshy: Aıgerim Taýbaı