Kezdesý barysynda taraptar eki el yntymaqtastyǵynyń qazirgi ahýaly men perspektıvalaryn talqylady, dep habarlaıdy Qamshy aqparattyq agenttigi Aqordanyń baspasóz qyzmetine silteme jasap.

Qazaqstan Prezıdenti byltyr kúzde Saýd Arabıasy Koróldigine barǵan resmı saparynyń qorytyndysynda qol jetkizilgen mańyzdy nátıjelerge nazar aýdardy.

Nursultan Nazarbaev sońǵy 25 jylda Qazaqstan men Saýd Arabıasy arasyndaǵy qarym-qatynas qarqyndy damyp, tájirıbe almasý jolǵa qoıylǵanyn, sondaı-aq keń aýqymdy máseleler jóninde ýaǵdalastyqtarǵa qol jetkizilgenin atap ótti.

Memleket basshysy elderimizdiń arasyndaǵy yntymaqtastyqty nyǵaıtý úshin Qazaqstan aldaǵy ýaqytta da bar kúsh-jigerin jumsaıtynyn aıtty.

Sonymen qatar, taraptar kún tártibindegi mańyzdy jaıttardy, sonyń ishinde óńirlik qaýipsizdik, konfesıaaralyq qaqtyǵystardy sheshý máselelerin talqylady.

– Ózińizge málim, jaqynda Astanada Sırıadaǵy qaqtyǵystar jóninde kezekti kelissóz ótti. Bul kezdesýge Sırıa opozısıasynyń barlyq ókili qatysqanyn atap ótken jón, – dedi Nursultan Nazarbaev.

Samer Ál-Sabhan Qazaqstan Prezıdentine ekijaqty yntymaqtastyq máselelerin talqylaýǵa múmkindik týǵyzǵany úshin alǵys aıtyp, Saýd Arabıasy Koroliniń sálemin jetkizdi.

– Biz Qazaqstanǵa ıslam álemine qatysty máselelerdi sheshýge qosqan úlesi, sonyń ishinde Sırıadaǵy qantógisti toqtatýǵa degen umtylysy úshin rızashylyq bildiremiz. Saýd Arabıasy Koróldigi Sırıadaǵy qaqtyǵystar saıası retteý arqyly sheshilýge tıis dep sanaıdy. Biz bul máseleni tek beıbit jolmen sheshý jónindegi Sizdiń ustanymyńyzdy qoldaımyz, – dedi Samer Ál-Sabhan.

Sondaı-aq, kezdesýge Qazaqstan Prezıdentiniń kómekshisi N.Onjanov, Syrtqy ister mınıstri Q.Ábdirahmanov jáne Saýd Arabıasy Koróldiginiń Qazaqstandaǵy elshisi Zahır ben Mýtısh Ál-Enazı qatysty.

Sholýshy: Gúlim Jaqan