Orystyń osy sózi aryp-ashyp jol júrip kele jatyp bir asyǵys, eki úsigistiń arasynda asqazan aldaý úshin shala-sharpy kúıinde bir-eki tolǵap, jutyp jiberetin júrek jalǵardyń atyna jaqsy keledi. Odan da góri kóbinese araq ishetin adamnyń aıǵyr stakanmen toltyryp quıyp, tartyp jibirip, tyjyrynyp jatyp qos tanaýynyń astyna tyqqylap jatatyn óńeshten óteriniń anyqtamasy retinde oryndy qoldanylady. Jaqsy jeri, munyń naqty bir jaǵdaıatqa, taǵamnyń túrine baılanysty aıtylý kerek dep qaqıyp qalatyn dástúrshildigi joq. Astaý-astaý et, tegesh-tegesh shubat deısiń be, álde qatqan nan, tistelgen jarty qurt, ıt jemeıtin ashynyń túrleri, taqa dym tabylmasa qara sý da qysyltaıańda zakýska qyzmetin atqaryp júre beredi. Siz de solaı oılaıtyn bolarsyz, men ózim zakýskanyń osy kóp qyrly "qasıetine" tántimin. Silekeılerińiz shubyrmaı tura tursyn, araq týraly aıtaıyn dep otyrǵan joqpyn...

Qor bolǵan búgingi qara dombyra ustaǵan qazaq ulttyq óneriniń Ieleri! Keshegi darhan dalanyń erkin uldary, degdar tuqymnan shyqqan ýyzyna jaryǵan baǵylan uldardyń qadirli meımandary! Búgin Senderdiń qandaı kúıge túsip júrgenderińdi kórsem, janym jabyrqaıdy. Árıne, dala ónerpazdarynyń da barlyǵynyń dárejesi birdeı bolmaǵan. Onyń ishinde de nebir kezbeleri tabylatyn. Alaıda, qaı ónerpazdyń da nápaqasy halyqtyń ústinde edi. Osydan-aq bilýge bolady qazaq úshin ánshi, kúıshi, jyrshylardyń bedeli men tuǵyr-taǵynyń qandaı bolǵanyn. Sol bedeldi jasaıtyn halyq qoı!

Dala ónerpazdary kóbine óz ónerlerin saýyn aıtyp shaqyrylǵan iri as-jıyndarda, toı-merekelerdi kórsetetin. Arnaıy shaqyrtýmen kelip qystap qalatyn, qudaıy qonaq bolyp túsip aılap jatatyndary da kóp edi. Biraq solardyń eshqaısysy da etekte otyryp tórdegi tórelerge óner kórsetken emes! Esti qazaqtyń tusynda olardyń da orny tqreniń qasynda, tórde edi. Ol az deseńiz taqymdarynyń astyna qos-qos qus jastyq salynatyn, sal-serilerge oń jaqta otyrǵan úkili qyz, toptan tańdap sulý kelinshekterge sháı quıǵyzatyn. Al, uzaq sala jyr aıtatyn jyrshylardyń shaıyn estıar kisige quıǵyzyp, kóp ishinen kótermeshi saılaıtyn. Al, bosaǵa – quldyń orny bolatyn. Qaıran, zaman, sóıtken ult múlkiniń Iesin qandaı kúıge túsirdiń?!

Qazirgi ulyqtar jaǵasy jarqyraǵan shendi-shekpendilerdi kútkende, elge kelgen "qurmetti qonaqqa" qonaqasy bergende, tipti quda kútkende de ónerpaz eńsesi túsip esiktiń aldynda turady. Búgingi qazaqtar úshin bul jazylmaǵan zańǵa aınalyp ketken. Ony aıtasyz, kúndelikti ótip jatatyn túrli jıyndar men dýmandarda aǵasymaq bireýi shaqyryp alyp: «Áı, bala, qazir bizdiń úıdegi jeńgeń sóz sóıleıdi, sodan soń sen qatyryp turyp bir án aıtyp beresiń» dep, qaıran ónerpazdy opyryq aýyz qatynynyń sóz sıqy joq birdemesiniń eki arasyndaǵy tiskebasarǵa aınaldyrǵannan keıin óner ustaǵan adamda qandaı qadir-qasıet qalyp jarysyn. Qazirgiler óner ıesi – ónerpazdy aqysy tólengen «qyzmetshi, qul» nemese «osylaı bolýǵa tıis» dep túsinedi eken. Men sony baıqadym. Sodan soń toı bolǵan úıdiń súmeńdep bosaǵasynda turǵan ónerpazdan júregiń daýalap, janyń aýyrmaı qandaı án-jyr tyńdaýǵa bolady. Osyndaı kórinisterden meniń kózime únemi álgi aıta beretin «zakýska» elesteıdi...

(Facebook-tegi paraqshasynan)