Mundaı shara jergilikti atqarýshy organdardyń qyzyǵýshylyǵyn arttyrady

Taldyqorǵanda Tóralqa Tóraǵasy Tımýr Qulybaevtyń qatysýymen Almaty oblysy kásipkerler palatasy Óńirlik keńesiniń keńeıtilgen otyrysy ótti.

Ulttyq palatanyń basshysy ákimdik pen bıznes-qoǵamdastyqtyń nazaryn otandyq taýar óndirýshilerdi qoldaýǵa aýdardy.

«Atameken» otandyq taýar óndirýshilerge barynsha qoldaý kórsetedi. Memleket basshysy ekonomıkanyń shıkizattyq emes sektoryn damytý tapsyrmasyn berdi, árıne, bul úderis otandyq taýar óndirýshiler arqyly júrgiziledi. Kez kelgen ınvestor nysan ashqan kezde, otandyq óndirýshige aınalady. Osylaısha jumyspen qamtý máselesi sheshiledi jáne salyq aýdarymy ulǵaıady», – dedi Tımýr Qulybaev.

Tóralqa Tóraǵasynyń aıtýynsha, jergilikti atqarýshy organdar satyp alýlardy júzege asyryp jatqanda óńirlik óndirýshilerge basymdyq tanytý kerek.

Tımýr Qulybaev otandyq kásipkerdi qoldaý týraly aıta otyryp, Tekeli qalasynda salynǵan avtojoldy mysalǵa keltirdi. Bul jol 7 jyldan astam ýaqyt buryn paıdalanýǵa berilgen, sapasy jaǵynan shet eldiń tanymal kompanıalarynan kem túspeıdi. Tóralqa Tóraǵasynyń aıtýynsha, osy jumys otandyq óndirýshilerge senim bildirýge bolatynyn kórsetedi.

«Óńirlik palata otandyq taýar óndirýshilerdiń tizimin daıyndaýy qajet, ol ákimdikterde bolýy kerek. Osylaısha tapsyrys jasaǵanda óńirlik jáne jergilikti óndirýshilerdi nazarǵa alý qajet», – dep atap ótti Tımýr Qulybaev.

Tóralqa Tóraǵasy, sonymen qatar, «Atameken» shaǵyn jáne orta bıznestiń salyq aýdarymdary óz óńirinde qalsyn degen usynys bildirgenin atap ótti. Bul jergilikti atqarýshy organdardyń óńirdegi shaǵyn jáne orta bıznesti damytýdaǵy qyzyǵýshylyǵyn arttyrady.

«Ákimdikter men máslıhattar osy jerde salyq salynatyn negizdi qurý úshin kásipkerlerdiń máselesimen aınalysady. Jalpy «Atameken» bıznes pen jergilikti atqarýshy organ arasyndaǵy baılanysty qamtamasyz etedi», – dedi Tımýr Qulybaev.