Atyraý oblysyndaǵy Aqqystaý aýlynyń turǵyny Saǵynǵalı qarıa oblys ákimi Nurlan Noǵaevqa “kryshasy” bar brakonerlerdiń kóp ekenin aıtyp, zańsyzdyqtan arasha surady. Bul týraly búgin Isataı aýdanynda ótken “Nur Otan”  partıasy aýdandyq fılıalynyń kezekten tys konferensıasynda belgili boldy.

“...Brakonerge men de qarsymyn. Qazir úsh brakonerdiń ekeýiniń kryshasy bar. Ustaıdy, kryshasy bardy qoıa beredi. Úsh máshıne ótedi, ekeýin ustaıdy, bireýin qoıa beredi. Endi mundaı ádiletsizdikti kórip turǵanda halyq ýshyǵady ǵoı”, – dedi ol oblys ákimine.

“Men resmı túrde aıtamyn. Biz bul joldan qaıtpaımyz. ...Eshkim balyq aýlamasyn demeıdi. Aýlaıyq, biraq jabaıylyqpen aýlamaıyq. Shamaly múmkindik bereıik. Balyq óssin, biz retimen ǵana shetinen alyp otyraıyq”, - dedi oblys ákimi brakonerlermen kúrestiń kúsheıetinin bildirip.

Nurlan Noǵaev soǵystan keıin azaıyp qalǵan balyqtyń 60-shy jyldary qalaı kóbeıgenin de esine aldy.

“Soǵys kezinde balyqtyń bárin maıdanǵa jibergen. Soǵys bitken soń 1945-65 jyldary balyq aýlaýdy ýaqytsha toqtatqan. (Sonyń arqasynda – red.) 65-shi jyldan keıin balyq qaptaǵan. Keıin ruqsat bergen. Búgin sol kún qaıta oralyp otyr, balyq taǵy joq”, - dedi ol.

Aıta ketelik, balyq ýyldyryq shashatyn mezgilde sý kóligin júrgizý erejesine narazy bolǵan bir top atyraýlyq sáýirde bılik ókilderimen qaqtyǵysqan edi. Sebebi, balyq qorǵaýmen aınalysatyn ınspeksıa sý janýarynyń kóbeıýine kedergi bolmaý úshin motorynyń qýaty 20 attyń kúshinen asatyn qaıyqtardy teńizge shyǵarmaı qoıǵan. Keıin narazylyq tanytqan 37 adamnyń turaqty jumysqa ornalasýǵa keliskeni belgili boldy.

Birneshe kún ótken soń zańsyz aýlanǵan 4 tonna balyqtyń Reseıge ótip ketkeni anyqtalyp, kóp uzamaı jergilikti Orman sharýashylyǵy jáne janýarlar dúnıesi aýmaqtaq ınspeksıasynyń basshysy Murat Ermekqalı óz erkimen jumysynan ketý týraly aryz jazdy.