Taraz memlekettik pedagogıkalyq ınstıtýtynyń janyndaǵy «Baýyrjantaný» ǵylymı-zertteý ortalyǵynyń qyzmetkerleri Ortalyq memlekettik kınofotoqujattar men dybys jazbalary muraǵatynan Baýyrjan Momyshuly týraly jańa beıne jáne dybys jazbalaryn tapty, dep habarlaıdy Qamshy aqparattyq agenttigi QazAqparat jańalyqtaryna siltep.

«1944 jylǵy kınojylnama tabyldy, - dedi JOO-nyń resmı ókili Jandar Asan. - Beınejazbalarda batyrdyń panfılovshylardyń erligi týraly estelikteri men jańa jylmen quttyqtaý sózi bar. Sonymen qatar, maıdan dalasynda qaza tapqan qazaq jaýyngeriniń anasyna kóńil aıtyp barǵan sáti taspalanǵan».

«Biz memlekettik muraǵattyń erekshe esebindegi qorynan Baýkeńniń Jeńistiń 30 jyldyǵyna baılanysty Qazaqstan jazýshylarymen kezdesýindegi sózderiniń jazbalaryn da taptyq. Buǵan deıin jazbalar esh jerde jarıalanbaǵan», - deıdi ortalyq qyzmetkeri Álimbaı Naızabaev.

Sonymen qatar, «Baýyrjantaný» ortalyǵy Halyq qaharmany Baýyrjan Momyshulynyń kóptomdyq shyǵarmalar jınaǵynyń kelesi 15 tomy daıyndalýda. Buǵan deıin onyń 30 tomy jaryq kórgen bolatyn.

2004 jyly ashylǵan ortalyq Halyq qaharmany Baýyrjan Momyshulynyń muralaryn jınaý, zertteý jáne basyp shyǵarý baǵytynda jumys atqarady. Buǵan deıin ult maqtanyshynyń kóptomdyq shyǵarmalar jınaǵynyń 30 tomy, Máskeýden «Legendarnyı batyr» degen atpen estelik kitaby, Almaty qalasynan «Fotoqujattyq álbomy» jaryq kórdi. Búginde bahadúr Baýkeńniń kóptomdyq shyǵarmalar jınaǵynyń kelesi 15 tomdyǵy daıyndalýda.

Kóptomdyqta dańqty qolbasshy týraly estelikter, dramalyq shyǵarmalar, arnaýlar, poemalar men balladalar toptastyrylǵan. 31, 32, 33, 34, 35, 36, 37, 38-tomdarda B. Momyshuly týraly belgili qalamgerler, ǵalymdar men qoǵam qaıratkerleriniń estelikteri jınaqtalǵan. Olardyń qatarynda Mamytbek Qaldybaev, Dmıtrıı Snegın, Ázilhan Nurshaıyqov, Tahaýı Ahtanov, Táken Álimqulov, Tursyn Jurtbaı, Myrzataı Joldasbekov, Bahytjan Momyshuly, Mekemtas Myrzahmetuly, Muhtar Shahanov, Qasym Qaısenov, Sherhan Murtaza, Ǵabıt Músirepov, Zeınep Ahmetova, Ákim Tarazı syndy azamattar bar. Al 39-tomǵa Málik Ǵabdýllınnyń «Baýyrjan Momyshýly» atty orys tilindegi ocherki berilgen. Batyr týraly dramalyq shyǵarmalar 40, 41-tomdarda. Onda Sherhan Murtazanyń «Noqtaǵa basy syımaǵan», Járken Bódeshtiń «Juldyztas» jáne ózge de jazýshylardyń týyndylary bar.  42, 43-tomdarda jalpy sany 200 arnaý óleń toptastyrylǵan. 44-tomda poemalar, 45-tomda jyr, balladalar jınaqtalǵan.

«Jalpy, dúnıe júzinde Baýkeń týraly jazylǵan eńbekter óte kóp. Solardyń bárin jınap, aýdarý qajet. Osylardy rettesek, batyr aǵamyzdyń 100 tomdyǵyn shyǵarýǵa múmkindigimiz bar», - dep atap ótti ortalyq qyzmetkerleri.

Taraz memlekettik pedagogıkalyq ınstıtýtynyń rektory Darıa Qojamjarovanyń qoldaýymen ortalyq búginde Qazaqstan Respýblıkasy Ortalyq Memlekettik muraǵatyndaǵy Baýyrjan Momyshulymen qarym-qatynasta bolǵan qoǵam qaıratkerleri, aqyn-jazýshylar basqa da óner adamdarynyń jeke qorlaryndaǵy Baýkeńe baılanysty arhıvtik qujattardy jınaqtaý ústinde.