Aqtóbe oblysynda erli-zaıypty sýısıd jasady, - dep habarlaıdy Tengrinews.kz.
"2017 jyljyń 15 mamyrynda "102" telefonyna Aqtóbe qalasynyń mańyndaǵy Quraıly aýylynda retranslásıa munarasynyń ústinen bir áıel men er adamnyń sekirýge daıyn turǵany jaıly anonım habar tústi. Oqıǵa ornyna barǵan jergilikti atqarýshy jáne quqyq qorǵaý organdarynyń ókilderi olarmen kelissóz júrgizdi, biraq buǵan qaramastan er adam men áıel munaradan sekirip ketip, alǵan dene jaraqattarynan oqıǵa ornynda qaza tapty", - dep habarlady İİD ókilderi.
Sóıtsek, buǵan deıin olarǵa qatysty sotaldy tergeý bastalǵan eken. Olarǵa QR Qylmystyq kodeksiniń 140-babynyń 2-bóligi boıynsha ("Kámeletke tolmaǵan adamdy tárbıeleý jónindegi mindetterdi ata-anasynyń nemese ózine osy mindetter júktelgen ózge adamnyń, sol sıaqty pedagogtiń nemese oqý, tárbıeleý, emdeý mekemesiniń nemese kámeletke tolmaǵan adamdy qadaǵalaýdy júzege asyrýǵa mindetti ózge mekemeniń basqa da jumyskeriniń kámeletke tolmaǵan adamǵa qatygezdik tanytýymen ulasqan oryndamaýy nemese tıisinshe oryndamaýy") kúdik kelgen.
İs materıaldaryna qaraǵanda, 2017 jyldyń 13 mamyrynda Quraıly aýyldyq okrýginiń terıtorıasynda tekseris kezinde polısıa ınspektoryna aýyldaǵy kóshelerdiń biriniń turǵyndary osy mańda turatyn úılerdiń birinen 7 jasar qyzdyń joǵalyp ketkenin habarlaǵan. Aıtýlarynsha, qyzdy olar úsh kúndeı ýaqyt kórmegen.
Qyzdyń turatyn úıine barǵan ınspektorǵa ákesi men ógeı sheshesi onyń týystardyń úıinde júrgenin aıtqan. Alaıda polısıa qyzmetkerleri kórshi bólmege kirip, kózi isip, jylap jatqan qyzdyń jatqanyn baıqaǵan. Qyz oblystyq balalar aýrýhanasyna "Bassúıek mıdyń jabyq jaraqaty. Mıdyń shaıqalýy. Denedegi kóptegen isik" dıagnozymen jatqyzylǵan.
Aqtóbe oblystyq İİD ókilderi sýısıd deregi boıynsha QR Qylmystyq kodeksiniń 105-babynyń 1-bóligi boıynsha ("Ózin-ózi óltirýge deıin jetkizý") sotqa deıingi tergeý júrgizip jatyr, saraptamalar taǵaıyndalǵan. Qazirgi ýaqytta oqıǵanyń mán-jaıy anyqtalyp jatyr. Polıseıler tergeýdiń nátıjesin aldaǵy ýaqyttarda habarlaýǵa ýáde berdi.
