«Alash» partıasynyń 100 jyldyǵyna oraı Baıanaýyl aýdanynyń azamattary «Ulylarǵa taǵzym - urpaqqa amanat» dep atalatyn atty ekspedısıa quryp, tarıhı oryndardy aralaýdy bastady, dep jazady Qamshy aqparattyq agenttigi. Bul týraly áleýmettik jelide  Nur Otannyń Baıanaýyl paraqshasy jazǵan.

Elbasy Nursultan Nazarbaev usynǵan «Týǵan jer» baǵdarlamasy aıasynda oblystyq máslıhat hatshysy Oral Sartaevtyń bastamasymen jáne «Nur Otan» partıasy aýdandyq fılıalynyń qoldaýymen qurylǵan ekspedısıalyq toptyń quramynda jeti adam bar. Olar óńirdegi kıeli jerlerdi, tarıhı eskerkishterdi jáne tanymal tulǵalardy týdyrǵan eldi mekenderdi atpen aralap, aýyl jastarymen kezdesýde.

- Atty ekspedısıa 12-mamyr kúni jolǵa shyqty. Maqsatymyz - shalǵaı aýyldardaǵy jastarmen kezdesip, jas urpaqty elin-jerin súıýge úgitteý, olardy at sportyna jáne ulttyq ónerge baýlý. Aldymen at basyn Leker qajy atyndaǵy aýylǵa buryp, aýyl turǵyndarymen jáne jastarymen kezdestik. Odan shyqqan soń Júsipbek Aımaýytov jáne Jumat Shanın aýyldaryna baryp, ulylardyń týǵan jerine taǵzym jasadyq. Aımaýytov aýylynda kókpardan jarys uıymdastyrylsa, keıingi eldi mekende asyq atý saıysyn ótkizdik. Sonymen qatar, osy aýyldardaǵy Kúreńbaı synshynyń zıraty, Qabylbek, Qaziret mekenindegi ulylardyń qorymyna, sondaı-aq, Maılytondardyń eski zıratyna, Nurǵalı mollanyń medresesi bolǵan orynǵa, usta, zerger, kenshi, geolog - Qosym Pishembaevtyń máńgilik jatqan jerine baryp duǵa oqyp, quran baǵyshtadyq, - deıdi oblystyq máslıhattyń depýtaty Oral Sartaev.

Salt attylardyń endigi baǵyty – Buqar Jyraý, Máshhúr Júsip kesenelerine toqtap, ulylardyń rýhyna duǵa baǵyshtaý. Odan keıin at basyn Jaıaý Musa, Qanysh Sátbaev jáne Sultanmahmut Toraıǵyrov aýyldary men Sháken Aımanov dúnıege kelgen Aımanbulaq jerine burý. Júrgen jerlerinde ártúrli kezdesýler, mádenı jáne sporttyq sharalar uıymdastyrýdy josparlap qoıǵan. 

Aıta keteıik, saıahatshylardyń quramynda oblystyq jáne aýdandyq máslıhattyń depýtattary, óner jáne sport salasynyń mamandary bar.