Almaty qalasynyń qylmystyq ister jónindegi mamandandyrylǵan aýdanaralyq sotynda bankır Muhtar Ábilázov pen onyń sybaılastaryna qatysty qylmystyq isti qaraý odan ári jalǵasýda. Sottyń búgingi otyrysynda «Klostrade Financial Group LTD» ofshorlyq kompanıasy arqyly BTA banktiń 4,8 mıllıard teńgesin jymqyrýǵa qatysty oqıǵa qaraldy. Bul kompanıa da Seıshel araldarynda tirkelgen.
«Bir kúndik» kompanıanyń dırektory retinde áldebir Djefrı Teılor degen adam kórsetilgen. Aıta keterlik jaıt, ofshorlyq kompanıalardyń jalǵan jetekshileri eshqashan Qazaqstanǵa kelmegeni beseneden belgili. Olaı bolsa, BTA banktiń qyzmetkerleri de olardy eshqashan kórmegeni aıdan anyq.
«Klostrade Financial Group LTD» kompanıasyna nesıe berýge qajetti qujattardy №6 korporatıvtik bıznes basqarmasynyń qyzmetkerleri daıyndaǵan. Buǵan deıingi sot otyrystarynda atalǵan qurylymnyń tikeleı Muhtar Ábilázovtyń baqylaýynda bolǵany birneshe márte aıtylǵan edi.
№6 korporatıvtik bıznes basqarmasynyń negizgi mindetteriniń biri - BTA bankten esh kedergisiz nesıe aqsha alý úshin Muhtar Áblázovtiń nusqaýymen ofshorlyq aımaqtarda «bir kúndik» kompanıalardy tirkeý bolyp tabylǵan.
Sot otyrysynda buǵan deıin túsinik bergen kýágerlerdiń aıtýyna qaraǵanda, komersıalyq qyzmetpen aınalysqanyn asyryp kórsetý úshin negizgi kompanıaǵa baǵynyshty enshiles kompanıalar ártúrli taýarlardy satyp alý maqsatynda Muhtar Áblázovtiń baqylaýyndaǵy basqa «bir kúndik» kompanıalarmen kelisim-shart jasaǵan. Túptep kelgende, eshqandaı kompanıa taýar satyp almaǵany anyq. Al jalǵan kelisimder tek bankten nesıelik qarajattardy alýǵa ǵana qajet bolǵan.
«2008 jyly «Klostrade Financial Group LTD» kompanıasy BTA bankten nesıe aqsha alýǵa birneshe ret ótinish bergen. Nesıe aqshanyń maqsaty retinde jasalǵan kelisim-sharttar boıynsha mindettemelerdi oryndaýǵa jumsalatyny kórsetiledi», - dep habarlady sot otyrysynda memlekettik aıyptaýshy Erkin Baımaǵambetov.
Atap aıtarlyǵy, kelisim-sharttyń mánine kelgende eshkim basyn qatyrmaǵan kórinedi. Óıtkeni, taýardy M. Áblázovqa baǵynyshty basqa bir kompanıa tasymaldaıdy. Mysaly, bul joly soıa burshaǵy men basqa da tez buzylatyn azyq-túlik ónimderin «Noble Resources», «Bunge SA» kompanıalary jetkizýi tıis bolǵan. Biraq túptep kelgende, taýar da, ony satyp alýǵa BTA bankten bólingen nesıe aqsha da Qazaqstanǵa jetpegen.
«Bul joly da bankishilik normatıvtik qujattarǵa qoıylatyn talaptar buzylǵan. Kepilzattyq mindetteme qamtamasyz etilmeıdi. Alaıda soǵan qaramastan, BTA banktiń nesıe komıteti atalǵan akredıtıvti ashý týraly zańsyz sheshim shyǵarady» - dep jalǵady sózin memlekettik aıyptaýshy.
Jalpy alǵanda bul qylmystyq keste arqyly Muhtar Áblázov pen onyń sybaılastary 4,8 mıllıard teńgeni jymqyrǵan.
Aıta ketelik, qashqyn bankır Muhtar Ábilázovtiń qylmystyq isi boıynsha basty sot otyrysy aǵymdaǵy jyldyń 3-inshi sáýirinde bastaldy. Sot otyrystaryna úsh memlekettik aıyptaýshy, sottalýshylardyń qorǵaýshylary jáne BTA bankiniń ókili qatysýda. Qylmystyq istiń jalpy kólemi 2 224 tomnan turady. Aıyptaýshylar tiziminde 200-den astam kýágerler bar. Muhtar Ábilázovtiń ózi alǵashqy sot otyrysynan bastap sotqa kelgen joq. Onyń múddesin sotta memleket belgilegen qorǵaýshy Anjelıka Ájiǵulova qorǵaýda.
