QR Aqparat jáne komýnıkasıalar mınıstri Dáýren Abaev Halyq bank pen Qazkommersbank arasyndaǵy bolýy yqtımal mámilege qatysty naqty nátıje bolmaıynsha, aqparat taratyp, jurtty dúrliktirýge bolmaıdy dep esepteıdi, dep jazady Qamshy aqparattyq agenttigi.
«Bankterdiń birigýi - qalypty proses. El turǵyndary óz depozıtterin joǵaltyp alamyz dep qoryqpaýy kerek. Bálkim, halyq ótken tájirıbelerge qarap, ýaıymdap otyrǵan shyǵar. Mundaı ýaıym men kúdikke esh negiz joq. Eń negizgisin atap ótkim keledi: Qazkom da, Halyq bank te Qazaqstan azamattarynyń salymdaryn kepildendirý qorynyń qatysýshylary. Sol sebepti, eshqandaı suraqtar men alańdaýshylyqtar týyndamaýy tıis. Naqty nátıjege qol jetkizbeıinshe, mundaı dúnıelerdi jarıalaýǵa, jarnamalaýǵa bolmaıtynyn túsinýimiz qajet. Bul endi komersıalyq qupıa dep atalatyn bólek másele», - dedi mınıstr «Habar» telearnasyndaǵy «Otkrytyı dıalog» jobasy aıasynda.
«Halyq banki» AQ basqarma tóraıymy Úmit Shaıahmetovanyń aıtýynsha, eger mámile júzege assa, Halyq bank Qazkomdy satyp alyp, óziniń enshiles bankine aınaldyrady.
«Ázirge Qazkommen naqty kelisimshart jasalǵan joq. Mamyrdyń sońynda mámile aıaqtalady dep josparlanǵan edi, alaıda bul merzim keıinge shegerildi. Qazir Kazkomnyń jumys parametrleri tekserilip jatyr. Syrttan aýdıtor, konsýltant shaqyrdyq. Sondaı-aq, Ulttyq bankten keńes alyp jatyrmyz», - dedi Ú. Shaıahmetova.
Sondaı-aq, Dáýren Abaev qazaqstandyqtardy zeınetaqy qarajattary týraly alańdamaýǵa shaqyrady, óıtkeni olar memlekettik kepildememen qorǵalǵan.
«Qazirgi ýaqytta tekserý júrgizilip jatyr, anyq-qanyǵy jarıalanyp, qoǵam nazaryna usynylady. Qazaqstanda zeınetaqy jınaqtaryna memlekettik kepildeme bar, ony eshkim alyp tastaǵan joq, ol jerde tipti ınflásıa da eskeriledi. Sonydyqtan, zeınetaqy alýy tıis azamattar mindetti túrde alady. Oǵan eshqandaı kúmán joq, eshkim alańdamasyn», — dep málimdedi aqparat jáne komýnıkasıalar mınıstri Dáýren Abaev Habar telearnasyndaǵy "Otkrytyı dıalog" jobasynda.
Mınıstrdiń aıtýynsha, tıisti tekserý nátıjesinde mundaı ınvestısıalardyń durys-burystyǵy anyqtalady.
Sholýshy: Gúlim jaqan
