«Atameken» QR UKP Tóralqa Tóraǵasy Tımýr Qulybaev Qyzylorda oblysyna jasaǵan jumys saparynda oblys basshysy Qyrymbek Kósherbaevtyń jáne óńirdegi bıznes-qoǵamdastyq ókilderiniń qatysýymen ótken Óńirlik keńes jıynyn ótkizip, oblysta kásipkerlikti qoldaý men damytý úshin qabyldanǵan sharalarǵa oń baǵasyn berdi.
Kezdesýde Tımýr Qulybaev bıznesti bastaý men damytý jónindegi máseleni sheshý úshin oblys ortalyǵy men aýdandarda Kásipkerler úıi men Kásipkerlerge qyzmet kórsetý ortalyǵy ashylǵanyn atap ótti.
Qyzylordada ashylǵan Kásipkerlerge qyzmet kórsetý ortalyǵynda elektrondy formatta bos jatqan jer ýchaskeleri týraly, ınjenerlik jeliler týraly aqparat alýǵa, sondaı-aq tehnıkalyq talaptardy jasatýǵa jáne sáýlet pen jer máseleleri boıynsha ruqsat qujattaryn rásimdeý úshin barlyq jaǵdaılar jasalǵan. Qyzylorda oblysy ákimdigi Kásipkerlerge qyzmet kórsetý ortalyǵyn ashý úshin 50 mln teńge bóldi, sonymen qatar jer kadastry, gaz, jylý, elektr qýaty jáne sýmen jabdyqtaý jónindegi málimetter bazasyn sıfrlyq júıege kóshirýge 30 mln teńge bóldi.
«Kásipkerlerdi qoldaýda jáne ákimdikter men memlekettik organdar arasynda ózara qarym-qatynas ornatýda tájirıbelerińiz oń jolǵa qoıylǵan. Biz kásipkerler úshin barlyq proses ashyqtyq ári qol jetkize alatyndaı bolýyn qamtamasyz etemiz», – dedi Tımýr Qulybaev.
«Atameken» basshysy memlekettik satyp alýlarda otandyq taýar óndirýshilerdiń áleýetin paıdalanýda oblysta júzege asyrylǵan tájirıbeniń ózge óńirlerge de taratylatyndyǵyn atap ótti.
Ulttyq kásipkerler palatasynyń bastamasymen 2016 jyldyń sáýir aıynda otandyq ónimdi ótkizý úshin jáne memlekettik organdar, munaı kompanıalary men kvazımemlekettik sektordyń taýar, eńbek jáne qyzmet túrlerin satyp alýlarynda jergilikti qamtý úlesin arttyrý maqsatynda Jumys komısıasy quryldy. Óńirdegi qurylys materıaldaryn shyǵaratyn jáne jeńil ónerkásip salasyndaǵy 50 kompanıaǵa qoldaý kórsetildi.
Belgilengen jospar boıynsha, 2016 jyly 117,3 mlrd teńge bólingen. Palata 70 mlrd teńgeden astam somadaǵy satyp alýlarǵa taldaý jasady. Onyń shamamen 50 mlrd teńgesine nemese 67,5% otandyq ónim qamtylǵan. Sondaı-aq árbir aýdandy jekelep kórsetken, 200-den astam otandyq taýar óndirýshiler sýbektisi engizilgen otandyq taýar óndirýshiler reestri daıyndaldy.
Bıznes pen memlekettik organdar arasynda ózara is-qımyl joǵary deńgeıge jetti. Bul zaańnamalarǵa ózgeris engizý, kásipkerlik jelisi boıynsha qarajat bólý nátıjesinde iske asyrylyp otyr. Búginde «Atameken» Ulttyq kásipkerler palatasy bıznesti qoldaý máseleleri boıynsha el Úkimetiniń tolyqtaı seriktesi bolyp qalyptasty», – dep túıindedi Tımýr Qulybaev.
Kezdesýdi qorytyndylaı kele, «Atameken» UKP Tóralqa Tóraǵasy Qyzylorda oblysynyń ákimi Qyrymbek Kósherbaevqa «Atameken» qurmet medalin tabystady.
