Kóktemgi sý tasqyny kezinde Mahambet aýdanyndaǵy úıi qırap qalǵan taǵy bir otbasy baspanaly boldy. Bas Múftı Erjan qajy Malǵajyuly keshe Saǵynysh Tobajanovaǵa "Nur Aqtóbe" aýdanynan eki bólmeli páterdiń kiltin tabys etti, dep habarlaıdy Qamshy aqparattyq agenttigi dinı basqarmanyń resmı saıtyna silteme jasap.

Eki bólmeli páter Mańǵystaý, Ońtústik, Batys Qazaqstan, Atyraý, Qyzylorda, Qostanaı jáne Aqtóbedegi oblystyq meshitterde jınalǵan asar aqshasyna satyp alynǵan. Elimizdiń Bas múftıi Erjan qajy Malǵajyuly búgin bul shańyraqta qonaq boldy. Tobajanovtar áýleti tasqynǵa deıin Mahambet aýdanynda úsh bólmeli úıde turǵan. Baspanany sý shaıyp, qırap qaldy. Turýǵa jaramsyz. Ne jerdiń, ne páterdiń kezeginde joq ári múgedek adamy bar otbasyǵa "Qazaqstan musylmandary dinı basqarmasy asary" qory qol ushyn sozdy. Jıhazdarmen jabdyqtalǵan daıyn páter syılady. Azyq-túligin ákelip berdi. Aıta keteıik, Aqtóbedegi sý tasqyny kezinde 86 úı qulady. 65 adamǵa jer úchaskesi berildi. Segiz januıa ýaqytsha áleýmettik jataqhanaǵa ornalastyryldy. Eki otbasyǵa "Batys-2" aýdanynan, beseýine "Nur Aqtóbe" aýdanynan páter berildi. Taǵy bir januıaǵa muǵaljarlyq kásipker úı syılady.