Búgin Qutqarýshy Hrıstos hramynda Qazaqstan Respýblıkasynyń Reseı Federasıasyndaǵy Tótenshe jáne Ókiletti Elshisi Imanǵalı Tasmaǵambetov Máskeý jáne búkil Reseı Patrıarhy Kırıllge I dárejeli "Dostyq" ordenin tapsyrdy, dep habarlaıdy Qamshy aqparattyq agenttigi Qazaqstannyń RF-daǵy elishiliginiń resmı saıtyna silteme jasap.
Qazaqstan Respýblıkasynyń Prezıdenti N.Á.Nazarbaevtyń Jarlyǵymen Orys pravoslav shirkeýiniń jetekshisi "memlekettik jáne qoǵamdyq qyzmetke, eldiń áleýmettik-ekonomıkalyq jáne mádenı damýyna qosqan úlesi, halyqtar arasyndaǵy dostyq pen yntymaqtastyqty nyǵaıtýdaǵy sińirgen eńbegi úshin" joǵary nagradaǵa ıe boldy.
Imanǵalı Tasmaǵambetov osynaý aıtýly kúni Qazaqstan Respýblıkasy men el Prezıdenti Nursultan Nazarbaevtyń atynan nagrada tapsyrý úlken mártebe ekenin aıtty. "Bul Sizdiń beıbitshilik pen kelisimdi, eki eldiń halyqtary arasyndaǵy dostyq qarym-qatynastardy nyǵaıtýdaǵy tynymsyz ári ólsheýsiz eńbegińizge degen aıryqsha qurmet", – dep atap ótti qazaqstandyq dıplomat.
"Qazaqstanda ıslammen qatar, pravoslav dini de qoǵamdyq ómirde erekshe orny bar jetekshi konfesıalardyń biri. Bizdiń elimizde Orys pravoslav shirkeýi óte mańyzdy jasampaz qyzmetti atqarady", – dedi Elshi.
Óz kezeginde Patrıarh Kırıll kórsetilgen joǵary marapat úshin Qazaqstan Prezıdenti Nursultan Nazarbaevqa alyǵysyn jetkizip, barsha qazaq halqyna beıbit ómir men ósip-órkendeýine nıettestik bildirdi.
"Dostyq" ordeni – Qazaqstan Respýblıkasynyń joǵary nagradalarynyń biri. Bul ordenmen qoǵamdaǵy ultaralyq jáne azamattyq tatýlyqty saqtaýda jemisti jumys atqarǵan, halyqtar arasyndaǵy beıbitshilikti, dostyq pen yntymaqtastyqty nyǵaıtýǵa eńbek sińirgen azamattar marapattalady. Orden ıegerleriniń arasynda – BUU Bas hatshysy Pan Gı Mýn, UQKU bas hatshysy Nıkolaı Bordúja, Máskeý jáne búkil Reseı Patrıarhy Aleksıı II, AQSH Prezıdenti (1989-1993) Djordj Býsh (úlkeni), AQSH-tyń 67-shi Memlekettik hatshysy Hılları Klınton, Ulybrıtanıanyń Premer-mınıstri (1979-1990) Margaret Techer, kardınal-epıskop, kardınaldar alqasynyń dekany (2001) Andjelo Sodano, Saýd Arabıasynyń patshasy – Abdýlla ıbn Abdýl Azız as-Saýd, Horvatıa Prezıdenti (2000- 2010) Stepan Mesıch, Rýmynıa Prezıdenti Ion Ilıeský, Tatarstan Respýblıkasynyń tuńǵysh Prezıdenti Mıntımer Shaımıev, 1-shi premer-mınıstri Lı Kýan Iý, Túrkimenstan prezıdenti Gýrbangýly Berdymýhamedov, Slovakıa Prezıdenti (2007) Ivan Gashparovıch, Vengrıa Prezıdenti (2007) – Laslo Shoıom, FIFA prezıdenti Iozef Blatter, RF Prezıdenti Ákimshiliginiń basshysy Sergeı Ivanov, qarý qurastyrýshy Mıhaıl Kalashnıkov, baletmeıster Iýrıı Grıgorovıch, KSRO Halyq ártisi Iosıf Kobzon jáne basqa tanymal tulǵalar bar.
