Almaty qalasynyń qylmystyq ister jónindegi mamandandyrylǵan aýdanaralyq sotynda BTA banktiń aqshasyn urlaý isi boıynsha taraptardyń sóz saıysy odan ári jalǵasýda. Sottaǵy sózinde memlekettik aıyptaýshylar Erkin Baımaǵambetov pen Tımýr Shamaı sottalýshylarǵa qylmystyq isti qaraý barysynda taǵylǵan aıyptardyń tolyqtaı dáleldengenin málimdedi dep habarlaıdy Qamshy aqparattyq agenttigi.
«Muhtar Áblázovti kináli dep tanyp, múlkin kámpeskeleýmen, 300 aılyq eseptik kórsetkish kólemindegi aıyppuldy tóleýmen qatar 20 jylǵa bas bostandyǵynan aıyrý jazasyna kesýdi suraımyn, jazasyn barynsha qaýipsiz jaǵdaıda ótesin. Onyń bank uıymdarynda kásibı qyzmetpen aınalysýyna úsh jylǵa deıin tyıym salynsyn. Jaqsylyq Jarymbetovti kináli dep tanyp, banki uıymdarynda kásibı qyzmet etýine úsh jylǵa deıin tyıym salýmen qatar 5 jylǵa bas bostandyǵynan aıyrýdy suraımyn. QR Qylmystyq kodeksiniń 63 babynyń negizinde jazasyn úsh jylǵa deıin synaq merzimimen shartty túrde óteý usynylady. Qaırat Sadyqovty kináli dep tanyp, 18 jylǵa bas bostandyǵynan aıyrý jazasy belgilensin. Sondaı-aq, múlki kámpeskelenip, 300 aılyq eseptik kórsetkish kólemindegi aıyppuldy tóleýmen qosa bankilik uıymdarda kásibı qyzmetpen aınalysýyna úsh jylǵa deıin tyıym salynsyn. Jazasyn eńbekpen túzetý júıesiniń organdarynda ótesin»,- dedi sottaǵy sózinde Erkin Baımaǵambetov.
Memlekettik aıyptaýshy sottan Sádýaqas Mámeshti 5 jylǵa abaqtyǵa qamaýdy surady. Jazasyn úsh jylǵa deıin synaq merzimimen shartty túrde óteý usynyldy. Aıta keterligi, sot otyrysynyń basynda BTA bank basqarma tóraǵasynyń birinshi orynbasary-nesıe komıtetiniń tóraǵasy Jaqsylyq Jarymbetov óz kinásin tolyq moıyndaǵan bolatyn. Taraptardyń sóz saıysynyń aldynda BTA banktiń burynǵy basqarma tóraǵasy Sádýaqas Mámásh te istegen qylmysyna ókinetinin jáne óz kinásin tolyqtaı moıyndaıtynyn málimdedi. Prokýrorlardyń Jarymbetov pen Mámeshke shartty túrde jazany suraýyna olardyń óz kinásin tolyqtaı moıyndaýy sebep bolǵanǵa uqsaıdy.
«Jábirlenýshi taraptiń ókiliniń azamattyq shaǵymy tolyqtaı qanaǵattandyrylsyn jáne Bankke keltirilgen shyǵyn sottalýshylardan birdeı kólemde óndirilip alynsyn»,-dep sózin túıindedi prokýror.
Taraptardyń sóz saıysynda memlekettik aıyptaýshylar úsh kún boıy sóz sóıledi. Óıtkeni, olar sot otyrysynda qylmystyq istiń barlyq epızodtaryna egjeı-tegjeıli toqtalyp, sottalýshylardyń jasalǵan qylmystarǵa tikeleı qatysy baryna dáıekter keltirdi.
Eń aldymen, Erkin Baımaǵambetov BTA banktegi alaıaqtyqpen «aqsha toltyrý» týraly áńgimeledi. Onyń aıtýyna qaraǵanda, M. Áblázov aqsha urlamaı turyp, BTA bankke halyqaralyq qarjy ınstıtýttarynyń qaryzy jáne halyqtyń salymdary esebinen mol qarajat tartýy tıis bolǵan. Sheteldik ınvestorlar men nesıe berýshilerden aqsha alý úshin ol BTA bankte aksıonerleri salǵan birshama qarjy baryn kórsetýdi kózdeıdi. Basqasha sózben aıtqanda, asa iri somadaǵy ınvestısıalarǵa qol jetkizý banktiń jarǵylyq kapıtalynyń kólemine táýeldi bolǵan. Banktiń qarajaty qanshalyq kóp bolsa, soǵurlym ol sheteldik qarjy uıymdarynan molyraq aqsha alatynyn bilgen.
Muhtar Áblázovtiń qylmystyq kestesin prokýrorlar qarjy pıramıdasymen salystyrdy. Ádette mundaı qarjy pıramıdalarynyń basty maqsaty - aqsha tabý múmkindigi az bolǵan jaǵdaıdyń ózinde iri kólemde tabys tabý úshin basqa tulǵalarǵa jalǵan tartymdylyq jasaý bolyp tabylady.
«Áblázov ınvestısıa tartý úshin banktiń emısıalaryn satý týraly sheshim qabyldaıdy. Shyǵarylǵan aksıalar bırjada ornalastyrylady. Bul komersıalyq jáne qarjylyq qurylymdarǵa nesıe berýshilerdiń aqshasyn tartý tásili. Alaıda QR-daǵy baqylaýshy jáne qadaǵalaýshy organdardan qupıa jaǵdaıda banktiń aksıalarynyń basym bóligin Áblázovtiń óziniń kompanıalary satyp alady»,- dedi prokýror. Erkin Baımaǵambetovtiń aıtynsha, joǵarydaǵy is-qımyldardyń nátıjesinde aksıalarǵa jasandy suranys paıda bolǵan jáne olardyń bırjadaǵy ótimdiligi qamtamasyz etilgen.
Buǵan qosa, memlekettik aıyptaýshy Muhtar Áblázovtiń BTA bankte qurǵan qylmystyq qaýymdastyǵy týraly egjeı-tegjeıli áńgimelep berdi. «Áblázov ózi jasaǵan jáne jetekshilik etken qylmystyq kesteni jalǵyz júzege asyra almaıtynyn bilgen. Sondyqtan ashkózdik maqsatyn iske asyrý úshin ol uıymdasqan qylmystyq qaýymdastyq (UQQ-avtor) qurǵan. Bul qaýymdastyqqa 100-den astam adam kirgen. Qaýymdastyqtyń qurylymy erikti uıymdasqan qylmystyq toptardan quralǵan. Qylmystyq qaýymdastyq músheleri uıymdastyrý jáne oryndaý belgileri boıynsha UQQ-tyń bólimsheleri, toptary jáne býyndarynyń arasynda bólinip qoıylǵan»,-dep túsindirdi prokýror.
