«Almaty Saq Qorǵandary» arheologıalyq parkinde Almaty qalasynyń turǵyndary men qonaqtarynyń Saq órkenıetine qyzyǵýshylyǵyn arttyrý maqsatynda mádenı-tanymdyq shara uıymdastyryldy dep habarlaıdy Qamshy aqparattyq agenttigi.
Qatysýshylardy sharanyń ashylýymen quttyqtaǵan Almaty qalasy Týrızm jáne syrtqy baılanystar basqarmasynyń basshysy Erlan Jaılaýbaı atalmysh parkti qalanyń tarıhı kórki retinde tanystyrdy. «Búgin uıymdastyrylyp otyrǵan sharany týrızmdi jáne qasıetti jerimizdi dáripteý jolyndaǵy parkimizdiń jańa bir jańǵyrýy bep bilemiz. Aldaǵy ýaqytta qorǵandar keshenin murajaılandyrýdy josparlap otyrmyz. Bastapqy jumystar 2018 jyly aıaqtalady dep kútilýde», – dedi Erlan Jaılaýbaı.
Baǵdarlama aıasynda sharaǵa qatysýshylar ataqty qazaqstandyq arheolog Rýslan Sherbaevtyń jetekshiligimen park alańynda uıymdastyrylǵan arnaıy ekskýrsıaǵa qatysty. Sonymen birge sadaq atý dáristerin alyp, alańdy abattandyrýǵa arnalǵan jappaı senbilikke qatysqan qonaqtar dástúrli palaý men kójeden de dám tatty. Odan keıin qolónershiler jármeńkesine qatysqan qonaqtar «Sarmat abyzy» atty tanymal arheologıalyq oljanyń rekanstrýksıasyn tamashalady.
Atalmysh shara «Almaty Saq qorǵandary» arheologıalyq parkin jetildirý men damytý jáne «Týǵan jer» baǵdarlamasyn júzege asyrý maqsatynda Týrısik Aqparat ortalyǵy tarapynan ázirlenip jatqan sharalar kesheniniń alǵashqysy boldy. «Qazaqstanda nazardan tys qalǵan kóptegen tarıhı eskertkishter bar. Almaty Saq qorǵandary úlken týrısik áleýetke ıe. Ony damytý kerek. Osy sebepti biz buqaralyq senbilikten bastadyq. Aldaǵy ýaqytta ınfraqurylymdyq damý men parkke kóbirek kóńil tartý maqsatynda budan da aýqymdy jobalardy josparlap otyrmyz», – dep atap ótti Týrısik Aqparat ortalyǵynyń dırektory Ásel Núrkebaeva.
İs-shara Almaty qalasy Týrızm jáne syrtqy baılanystar basqarmasynyń jáne Almaty qalasy ákimdigi Mádenıet jáne muraǵat basqarmasynyń, Alataý aýdany ákimdiginiń jáne «Kóshpeli órkenıet murasy» halyqaralyq qoǵamdyq qorynyń qoldaýymen ótti.
«Almaty Saq Qorǵandary» arheologıalyq parki (burynǵy «Boraldaı Saq Qorǵandary») týraly aqparat
Park erte kóshpeliler (b.z.b. VIII-III ǵǵ.) dáýiriniń qorymdarynan turady. Uzyndyǵy 3 km sozylǵan park alańynda 47 saq qorǵany bar. Olardyń eń úlkeniniń bıiktigi 14 metrge, al dıametri 100 metrge jetedi. Qorym Tıgrahaýda saqtarynyń patshalary men aqsúıekterin jerleý jeri retinde salynǵan degen boljam bar. 2007 jyldan bastap park alańynda ashyq aspan astyndaǵy murajaı salý jumystary júrgizilýde.
Týrısik Aqparat ortalyǵy (TIS) týraly aqparat
Almaty qalasynyń týrısik qabiletin arttyrý jáne Qazaqstan men shetel naryǵynda qalany tartymdy týristik baǵytqa aınaldyrý maqsatynda 2017 jyly qurylǵan.
