Adam óz ómirinde sansyz qıyndyqtardy bastan ótkeredi. Sondaı jaǵdaılarda bir orynda toqtap toqyrap qalý eń qaýipti nárse. Keıde ómirde bolatyn belgili-bir oqıǵalardyń jaqsy ózgerister ákeletinin biz bilmeı jatamyz.

Alaıda ol ózgerister biz oılaǵannan da qıyn ári aýyr bolýy múmkin.

Rahatbek Ýsenqojoev osyndaı qıyndyqtardy bastan keshirgen adamdardyń biri. Onyń áıeli men  úsh balasy bolǵan. Qolynan kelgenshe jumys istep bala-shaǵasyn asyraǵan. Osydan 7 jyl buryn Rahatbek qulap qalyp arqasyn zaqymdap alady. Sodan beri júre almaı qalǵan.

Áıeli mundaı aýyrtpalyqty kótere almaı Rahatbekti balalarymen birge tastap ketken. Sol kezde ol óziniń jaǵdaıyna qaramastan balalardy asyraý kerektigin oılap jumys isteıdi. Balalardy asyraý onyń basty stımýlyna, maqsatyna aınalady.

Rahatbek qolynan is keletinin sezedi. Anasyna bylǵarydan sómke tigip beredi. Sodan bastap tikken sómkelerin sata bastaıdy. Alaıda áý basta onyń sómkelerine suranys az bolady. Tapqan tabysy tek azyq-túlikke ǵana jetedi.

Arada biraz ýaqyttan keıin Rahatbek óz qolynan jasalǵan buıymdardy aýdandyq kórmege qoıady. Sol kezde adamdar onyń bylǵarydan jasaǵan jumystaryn kóredi.

Rahatbek Qyrǵyzstan azamaty. Ol Bishkekten 400 shaqyrym jerde ornalasqan aýylda ata-anasy men inisimen turady.  Dese de, bul jerde ǵalamtor jumys isteıdi. Endi oǵan taýar tapsyrystary basqa qalalardan, tipti basqa elderden kelip túsedi.

Sómkelerden bólek Rahatbek beldikter men belbeýler tigedi. Qazir ol óziniń bala-shaǵasyn asyraýǵa múmkindigi bar.

Jaqynda oǵan nemis dárgerlerinen ony emdeýge baılanysty usynystar tústi. Dárgerler ony emdeýge qaýqarly ekendikterin aıtyp ota jasaýǵa daıyn ekendikterin bildirgen. Alaıda ol úshin 50 000 evro qajet. Sonyń ózinde bul otadan keıin Rahatbek aıaqqa turyp kete ala ma, belgisiz.

Daıyndaǵan: Nazerke MUSA