Almaty qalasynda ótetin VI Inovasıalyq forým spıkeriniń biri -  robot. Bul týraly Ortalyq komýnıkasıalar qyzmetinde ótken baspasóz konferensıada «SUCCESS K» strategıalyq komýnıkasıalar agenttiginiń bas dırektory Lázzat Kókkózova málimdedi dep habarlaıdy Qamshy aqparattyq agenttigi.

Lázzat Kókkózovanyń sózinshe forým 30 maýsym kúni Almaty qalasy Atakent-EKSPO kórme ortalyǵynda ótedi. «Forýmnyń negizgi taqyryptary Indýstrıa 4.0 tujyrymdamasy, sandyq ekonomıka, ınovasıalyq ekojúıelerdi qurý jáne «Almaty – ómir súrý jáne bızneske qolaıly qala» atty ótken jyly bekitilgen qalany damytý strategıalyq taqyryby aıasynda Smart City tehnologıalaryn engizý bolady. Jıyn barysynda qalanyń ózekti máselelerin sheshý úshin ınnovasıalyq tehnologıalardyń qoldanysyn jetekshi halyqaralyq sarapshylarmen birge talqylaý josparlanýda», - dedi ol. 

Forým otandyq jáne sheteldik jobalar men bolashaqqa arnalǵan ınovasıalyq ıdeıalardyń kórsetilimi ótetin start-ap jobalar kórmesimen ashylady. «Atalǵan is-shara barysynda málimdelgen taqyryptar boıynsha prezentasıalar men talqylaýlar ótedi, klasterler men tehnoparkterdi jetildirý men jandandyrý boıynsha keıster, sandyq telekomýnıkasıalarmen aqyldy qala arqyly júzege asatyn ekonomıkadaǵy jańa strategıalar men tabysty tájirıbeler qarastyrylady», - dedi spıker.

«SUCCESS K» strategıalyq komýnıkasıalar agenttiginiń bas dırektory Lázzat Kókkózovanyń málimetinshe Forým spıkerleriniń biri robot bolmaq. Alaıda, uıymdastyrýshylar erekshe oratordyń qaı taqyrypty qaýzaıtynyn ashyp aıtpady.  

Forým jumysyn Almaty q. ákimi Baýyrjan Baıbek ashady dep kútilýde. Sondaı-aq, oǵan QR Bas prokýratýrasy Quqyqtyq statısıka jáne arnaıy esepke alý jónindegi komıtetiniń tóraǵasy, «Qazposhta» AQ burynǵy basqarma tóraǵasy Baǵdat Mýsın, «Global Visions-Silicon Valley» kompanıasynyń qurýshysy jáne bas atqarýshy dırektory jáne «CIO ORACLE» burynǵy aǵa vıse-prezıdenti Mark Ivanovskı, «Future Laboratory» basqarma tóraǵasy, Grýzıanyń Inovasıa men tehnologıalar boıynsha agenttiginiń burynǵy tóraǵasy  Iraklıı Kashıbadze qatyspaq.

Onymen qosa, forýmǵa Anglıa, Izraıl, AQSH, Danıadan keletin halyqaralyq sarapshylar, Qazaqstan Respýblıkasy memlekettik organdarynyń basshylary, bıznes-qoǵamdastyqtyń ókiletteri, ÚEU men halyqaralyq uıymdar, startapshylar jalpy 500-den astam adam qatysady.