Gúlshara Ábdiqalyqova saltanatty shara barysynda syılyq laýreattary men grant ıegerlerin, Memleket basshysynyń alǵysyna ıe bolǵan shyǵarmashylyq ujymdardy, sondaı-aq Qazaqstannyń barlyq jýrnalıserin kásibı merekesi – Baılanys jáne aqparat salasy qyzmetkerleriniń kúnimen quttyqtady.

– Qazir elimizdiń halyqaralyq oń ımıjin ilgeriletý jónindegi jumystar qyzý júrip jatyr. Sonyń ishinde Qazaqstannyń ınovasıalyq bolashaǵyn qalyptastyrý jáne álemniń ozyq 30 eliniń qataryna qosylý úderisterin jan-jaqty kórsetý isindegi otandyq BAQ-tyń róli arta túsýde. Osy strategıalyq mindetterdi tıimdi júzege asyrý memleket pen medıa-qoǵamdastyqtyń ózara jemisti is-qımyl ornatýy qajettigine negizdeledi, – dedi Memlekettik hatshy.

Sonymen qatar, Gúlshara Ábdiqalyqova júıeli túrde aqparattandyrý jumystaryn júrgizý bıyl Elbasy bastamashylyq etken Qazaqstannyń úshinshi jańǵyrýyn tabysty iske asyrýdyń negizgi faktorynyń biri bolyp sanalatynyn atap ótti.

Memleket basshysynyń ókimimen syılyqtar Qaraǵandy oblystyq «Ortalyq Qazaqstan» gazetiniń bas redaktory Maǵaýıa Slanbekuly Sembaevqa jáne «Habar» agenttiginiń menshikti tilshisi Maıra Qabıqyzy Abdrahmanovaǵa tabys etildi.

Granttar «Aıqyn» gazetiniń tilshisi Aıhan Pishenbaıuly Sháripov pen «Kazahstanskaıa pravda» gazetiniń tilshisi Iýlıa Dmıtrıevna Magerge tapsyryldy.

Qazaqstan Respýblıkasy Prezıdentiniń alǵysy «Astana» telearnasyndaǵy «Bizdiń ýaqyt» televızıalyq baǵdarlamasynyń, «Mysl» respýblıkalyq qoǵamdyq-saıası jýrnalynyń, Batys Qazaqstan oblystyq «Prıýrale» gazetiniń jáne «Habar 24» telearnasynyń shyǵarmashylyq ujymdaryna jarıalandy.