Elbasymyzdyń jarlyǵyna sáıkes maýsym aıynda QR Parlamenti Senatynyń depýttaryn saılaý ótti. Senattyń 16 depýtattyq mandatyna 38 úmitker tirkeldi. Senat depýtattaryn saılaý aıaqtalyp, qorytyndysy jarıalandy.
Osy tusta Senat depýttaryn saılaýy týraly, halyqtyń elimizde oryn alyp jatqan saıası jańalyqtarmen qanshalyqty tanys ekenin bilý úshin Qamshy aqparattyq agenttiginiń jýrnalısi Almaty qalasynyń turǵyndary arasynda saýalnama júrgizdi. Aıta ketsek, saýalnamaǵa ártúrli jastaǵy 35 adam qatysty. Onyń ishinde 4 adam jýrnalısiń saýalyna jaýap berýden bas tartty.
Júrgizilgen saýalnama nátıjesinde 35 adamnan 4 turǵyny ǵana eldegi saıası jańalyqtan habardar bolyp shyqty. Atalǵan 4 turǵynnyń ózi Senat saılaýynyń ótkeli jatqanyn teledıdardan kórgenderin aıtty. Alaıda kim saılandy, saılaý qalaı júrgizilip jatqanyna esh qyzyǵýshylyq tanytpaǵandaryn jetkizdi.
61 jastaǵy zeınetker: "Birneshe kún buryn teledıdardan osy jańalyqty estidim. Alaıda belgili bir sebeptermen saılaýdyń qalaı júrgizilip jatqanyn qaraýǵa múmkindigim bolmady. Eldegi saıası jańalyqtarǵa qyzyǵýshylyǵym erekshe, barlyq jańalyqtardy úzbeı qaraýǵa tyrysamyn. Elimizdegi depýttardyń saılaýy el úshin asa mańyzdy saıası jańalyq" degen pikir aıtty.
54 jastaǵy Almaty qalasynyń turǵyny Senat depýtattaryn saılaý 28 maýsym kúni ótkizilgenin aıtyp, saılaýdan ótetin adamdardyń barlyǵy aldyn-ala belgili bolady degen pikir aıtty. Onyń sebebi Senat depýtattaryn Máslıhatta saılaıdy, halyqtyń tańdaýyna salmaıtynyn tilge tıek etti.
50 jastan asqan turǵyndar ǵana eldegi saıası jańalyqtarmen salystyrmaly túrde birshama tanys bolyp shyqty. Árıne, kópke topyraq shashpaımyz, alaıda turǵyndardyń arasynda jumysty syltaý etip, jańalyq qaraýǵa ýaqyttary jetpeıtinderin aıtqandar da tabyldy.
Saýda ortalyǵynda kúzetshi bolyp qyzmet atqaratyn 25 jastaǵy er adam "Men saıasatqa qyzyǵamyn. EKSPO-nyń jańalyqtaryn qaraımyn. Kúni keshe oryn alǵan kazarmadaǵy balanyń aýyr jaǵdaıymen de tanyspyn. Alaıda Senat depýttattarynyń qalaı , qashan saılanyp jatqanyn, kimderdiń daýys berip jatqanyn bilmeımin" degen pikir aıtty.
Al 20 men 30 jas arasyndaǵy jastar qarbalas tirshiligin aıtyp, saıasattan habarsyz ekenderin aıtty. Olardyń arasynda Senat depýtattarynyń qandaı ispen aınalysatynyn bilmeıtinder de bar.
"Senat depýtatarynyń saılaýy jaıly jańalyqtardan kórgenmin, biraq olardyń tipti qandaı ispen aınalysatynyn da bilmeımin" dep qysqa jaýap berdi 20 jastaǵy stýdent qyz.
Halyqtyń basym kópshiligi , onyń ishinde áıelder qaýymy jýrnalısiń saýalyna jaýap berýden bas tartty. Onyń sebebin qarapaıym halyq Senat depýtattaryn saılaýdan eshqandaı zıan shegip otyrǵan joq dep túsindik. Aıtary bolmaǵan turǵyndar eldegi saıası jańalyqtan beıhabar ekenderin qalypty dep sanaıtyndaryn jetkizdi. Al kóshede qulaqqap taǵyp, jan-jaǵyndaǵy álemnen bólektenip júrgender kóptep kezdesedi.
«Senat depýttattarynyń jańadan saılanýy eshqandaı elge ózgeris ákelip jatqan joq, olardyń barlyǵy orystaǵy «spáshaıa sarstva» sekildi» dep ótkir pikir aıtty 50 jastaǵy dáriger bolyp qyzmet atqaratyn almatylyq turǵyn.
Al Senat depýtattarynyń jańadan saılanýy, basqa da saıası jańalyqtardan beıhabar 30 jastaǵy er adam : "Bizde bári jaqsy. Depýtattardyń saılanýy da jaqsy. Biz sekildi qarapaıym halyq úshin eldegi tynyshtyq pen bereke saqtalýy birinshi orynda " dep óziniń júrekjardy tilegin de bildirdi.
Qoryta kelgende, halyqtyń basym kópshiligi Senat depýtattaryn saılaý týraly jańalyqpen tanys emes. Depýtattardyń qandaı qyzmet atqaratynyn bilmese de, olardyń eńbegine kóńili tolmaıtyndar da tabyldy. Sonymen qosa ótkir synnyń astyna alǵandar da bar. Al halyqtyń elimizde bolyp jaqan sońǵy saıası ózgeristerden habardar bolmaýy tirshilik úshin jasalyp jatqan qarbalas jumystan ba, álde halyq arasynda durys nasıhatalmaý saldarynan ba ol jaǵy beımálim...
Saýalnama júrgizý barysynda Qazaqstan turǵyndarynyń elde oryn alyp jatqan eleýli ózgeristerge, saıası jańalyqtarǵa nemquraıly qaraıtyndaryn baıqadyq.
Saýalnamany júrgizgen : Aıgerim TAÝBAI
