Jumystan kelgenimde jubaıym Janar keshki as daıyndap jatyr edi. Jaqyndap baryp: «Mańyzdy nárse aıtýym kerek…» - dedim. Qasyma otyrdy. Aıtar sózim onyń júregin aýyrtatynyn túsinip turdym. Biraq, qansha qıyn bolsa da aıtýym kerek. «Ajyrasaıyq…» - dedim. Ashýlanbady, qarsy sóz de aıtpady. Sebebin surady. Eshnárse aıta almaǵanyma ashýlandy. Basqa áıeldi jaqsy kóretinimdi aıta almadym… Ol túnimen jylap shyqty.
Birge ótkizgen jıyrma jyldan keıin ajyrasý qıyn bolatyny túsinikti. Onyń aldynda ózimdi kináli sezingenim úshin oǵan kólik, úı jáne kompanıamnyń 30% úlesin beretin kelisimshart daıyndap qoıdym. Biraq ol qaǵazǵa bir qarady da, jyrtyp tastady. Ekeýimiz múldem beıtanys adamǵa aınaldyq. Onyń maǵan jumsaǵan ýaqyty men kúsh jigerine janym ashydy. Biraq júrekke ámir júrmeıdi, qazir basqa jandy, Lázzatty jaqsy kóremin… Kelesi kúni úıge kesh keldim. Áıelim ústel basynda bir nárse jazyp otyr eken. Eshnárse aıtpaı, bólmeme baryp uıyqtadym.
Erteńine maǵan óz shartyn usyndy. Menen eshqandaı materıaldyq zat qalamaıtynyn, tek ajyrasatynymyzdy bir aıǵa deıin eshkimge aıtpaı, jasyryn ustaýymdy surady. Osy ýaqyt ishinde jaqsy otbasyna uqsap ómir súrýimizdi ótindi. Buǵan sebep — jalǵyz ulymyz Asqar bir aıdan soń ýnıversıtetke túsetindikten, qabyldaý emtıhany kezinde otbasy ishindegi máseleler oǵan kedergi bolmasyn degen nıet eken. Kelistim. Ekinshi sharty da bar. Úılengen kúni, esikten úıge ony qolyma alyp kirgenimizdi esine túsirip, bir aı boıy ony qolyma alyp, bólmemizden esikke deıin aparyp júrýimdi surady. Basynda «Esinen aýysqan ba?» dep oıladym. Biraq ótken jyldardyń qurmetine kelistim…
Bul týraly súıiktim Lázzatqa aıtyp edim, bir kúldi de «Áıeliń — qıalı jan eken» dep mazaq etti. Aqyry áıelimmen ajyrasatynyma senimdi bolǵandyqtan, ol da bul shartty oryndaýyma kelisti.
Birinshi kúni esh sezimim qalmaǵan áıelimdi qushaǵyma alý qıyn boldy. Kótergenimde, qasymda turǵan ulym bizge qarap «Bir-birińizge degen sezimderińiz qandaı kúshti!» dep qýanyshyn jasyra almady. Bul sózder ishimdi kúıdirse de, keliskenimizdeı áıelimdi úıdiń esigine deıin qushaǵymda apardym. Ol bolsa kózderin jumyp, qulaǵyma «Ulymyzǵa ajyrasatynymyzdy aıtýshy bolma!» dedi. Men úndemedim. Ony esikke deıin aparyp, úıden birge shyqtyq. Ol aıaldamaǵa baryp, jumysyna baratyn avtobýsty kútti. Men óz jumysyma kettim.
Ekinshi kúni bul oıyndy oınaý ońaı boldy. Oǵan kópten beri nazar aýdarmaı, onyń betine túsken maıda ájimdi de baıqamappyn. Shashyna sál aq túsipti. Ótken jyldardyń izin kórip qatty oılandym.
Úshinshi kúni ony qushaǵyma alǵanymda, ishimde bir sezim paıda boldy. Ómiriniń jıyrma jylyn maǵan arnaǵan áıelge degen keremet bir sezim… Kelesi kúni ishimdegi sezim kúsheıe bastady. Bolashaq jarym Lázzatqa bul týraly aıtqan joqpyn. Áıelimdi kúnnen-kúnge kóterip júrý — Janar ekeýmizdi baqytqa bóleı bastady. Bir kúni onyń «Ne kısem eken?» dep oılanyp turǵanyn kórdim. Burynǵy kıimderi ózine keńeıip bara jatqanyn aıtty. Rasynda da, sońǵy kúnderi qatty aryqtap ketkenin endi baıqadym. Ajyrasatynymyzdy oılap, sonyń ýaıymymen aryqtaǵanyn túsindim. Eriksiz basynan sıpadym. Osy kezde kelip qalǵan ulymyz «Áke, anamdy qushaǵyńda tasýyń kerek…» dedi.
Janardy qushaǵyma alyp júrý — úıimizdiń bir dástúrine aınaldy. Áıelim ulymdy qasyna shaqyryp, kúlimsirep qushaqtady. Ony qushaǵyma alyp tasyǵanymda dál sol úılengen jyldarymyzdaǵydaı sezim keshtim. Sezimim eriksiz ózgere bastady.
Sońǵy, ıaǵnı otyzynshy kúni ony esikke deıin apara jatyp, odan barlyǵy úshin keshirim suradym… Úıden shyǵyp, Lázzatqa baryp, áıelimmen ajyraspaıtynymdy aıttym. Otbasymyzdyń álsiregeni, sezimniń joqtyǵynan emes, bir-birimizdi baǵalaı almaǵanymyzdan ekenin endi túsindim. Úıge qaıta jetýge asyqtym. Joldan gúlder alyp, arasyna «Seni ómirimniń sonyńa deıin qushaǵymda tasıtyn bolamyn!» - dep jazdym. Úıge bara salyp, bólmemizge qaraı júgirdim. Áıelim tósekte jatyr eken. Qasyna bardym. Áıelim demalmaı jatyr eken… Jedel-járdem shaqyrdym. Dáriger:
- Áıelińiz 4 aıdan beri obyr aýrýymen aýyrǵan eken. Ókinishke oraı, aýrýy asqynyp ketipti. Sodan kóz jumdy. Qaıǵyńyzǵa ortaqpyn,-dedi. Qatty ókinip, jyladym. Basqamen júrip, áıelimniń obyr aýrýymen arpalasqanyn bilmeı de qalyppyn. Al ol meniń qamymdy oılap, ómirine sanaýly kúnder qalǵanyn bilgeni úshin, ulymyzdyń aldynda meni Anasyn tastap ketken jaman Áke retinde kórsetpeýge tyrysypty.
Eń bolmaǵanda ulymyzdyń esinde meni jaqsy Áke, jaqsy jubaı bolýymdy qalapty. «Qadirimdi bilmegen qadirlim-aý, Qabirimdi qushaqtap jylap qalma...» degen sóz osy tusta aıtylýy tıis. Janyńyzda júrgen jandardy joǵaltqan soń emes, tiri kezinde baǵalańyz!
Sholýshy: Ásel Bolatqyzy
